திருக்குறள்- சென்ரியூ 36

by கவியருவி ம. ரமேஷ் Wed May 08, 2013 12:27 pm

குறள் 36:
அன்றறிவாம் என்னாது அறஞ்செய்க மற்றது
பொன்றுங்கால் பொன்றாத் துணை.

கலைஞர் உரை:
பிறகு பார்த்துக்கொள்ளலாம் என்று நாள் கடத்தாமல் அறவழியை மேற்கொண்டால் அது ஒருவர் இறந்தபின் கூட அழியாப் புகழாய் நிலைத்துத் துணை நிற்கும்.

மு.வ உரை:
இளைஞராக உள்ளவர், பிற்காலத்தில் பார்த்து கொள்ளலாம் என்று எண்ணாமல் அறம் செய்ய வேண்டும். அதுவே உடல் அழியும் காலத்தில் அழியா துணையாகும்.

சாலமன் பாப்பையா உரை:
முதுமையில் செய்யலாம் என எண்ணாமல் இப்போதே அறத்தைச் செய்க; அந்த அறம் நாம் அழியும் போது தான் அழியாமல் நமக்கு துணை ஆகும்.

ம. ரமேஷ் சென்ரியு

நாளை என்று நாள்
கடத்துவது
அறமன்று

வயது
தேவையில்லை
அறம் செய்ய

ஹிஷாலீ சென்ரியு

நொடிகள் மறவா
அறம்...
இறவாபடிகள்...!

உடலின்றி துணை
உலகில்
காலம் கடத்தா அறம்...!

வயதுகள் தேடா நல்லறம்
வாழ்கையின்
துணை வரம்...!

தளிரின் சென்ரியு

நன்றை இன்றே செயின்
என்றும் நன்மை
துணை வரும்.

அறமாகிய நன்றை இன்றே செய்கையில் வாழ்க்கை முழுதும் துணை நிற்கும்