பெரியகோயில் 1000-வது ஆண்டுவிழா: தஞ்சை நகருக்கு ரூ 25 கோடி ஒதுக்கீடு

தஞ்சைப் பெரியகோயில் 1000 ஆண்டு நிறைவடைவதை முன்னிட்டு தஞ்சை நகர மேம்பாட்டுப் பணிகளுக்காக 25 கோடியே 19 லட்ச ரூபாய் நிதி ஒதுக்கீடு செய்து முதலமை‌ச்ச‌ர் உத்தரவிட்டுள்ளார்.

இது தொடர்பாக தமிழக அரசு இ‌ன்று வெளியிட்டுள்ள செய்திக்குறிப்‌பி‌ல், மாமன்னர் ராஜராஜனின் தஞ்சைப் பெரியகோயில் 1000 ஆண்டு நிறைவடைவதைக் கொண்டாடும் வகையில், தமிழக அரசின் சார்பில், தஞ்சையில் செப்டம்பர் 25 மற்றும் 26 ஆகிய இரு நாட்களுக்கு விழா நடத்தப்படும் என்று முதல்வர் அறிவித்திருந்தார்.

அதையொட்டி தஞ்சை நகரில் சாலைகள் மேம்பாடு, பழைய மற்றும் புதிய பேருந்து நிலையங்கள் மேம்பாடு, பெரியகோயில் முதல் மருத்துவக் கல்லூரி வரை தெருவிளக்குகள், நவீன சுகாதார வளாகங்கள், ராஜராஜசோழன் சிலை நிறுவப்பட்டுள்ள பூங்காவை அழகுபடுத்துதல், பெயர்ப் பலகைகள் மற்றும் தகவல் பலகைகள் அமைத்தல்,

சாமந்தான்குளத்தினை மேம்படுத்துதல், பெரியகோயில் அருகிலுள்ள ஜி.ஏ.கால்வாயின் பாலத்தை அகலப்படுத்தல் ஆகிய அடிப்படைப் பணிகளை நிறைவேற்றுவதற்காக 25 கோடியே 19 இலட்சம் ரூபாய் நிதி ஒதுக்கீடு செய்து முதலமை‌ச்சர் உத்தரவிட்டுள்ளார்.