பிசிசிஐ-யின் இடைக்கால தலைவராக ஜக்மோகன் டால்மியா தேர்வு!

மும்பை: சென்னையில் இன்று மதியம் கூடிய பிசிசிஐ-யின் கூட்டத்தில் இடைக்கால தலைவராக ஜக்மோகன் டால்மியா தேர்வு செய்யப்பட்டார்.

ஐபிஎல் கிரிக்கெட் சூதாட்ட நெருக்கடி அதிகரித்ததை தொடர்ந்து பிசிசிஐ-யின் செயற்குழு கூட்டம் சென்னையில் இன்று கூடியது. இக்கூட்டத்தில் ஸ்ரீனிவாசன் தனது ராஜினாமாவை அறிவிக்கலாம் என எதிர்பார்க்கப்பட்ட நிலையில் அவர் பதவி விலகாமல், நிர்வாகத்தில் இருந்து விலகி இருக்கிறார்.

இன்று மாலை 4.30 மணி வரை நடந்த செயற்குழு கூட்டத்தில், 'ஸ்ரீனிவாசன் தலைவர் பதவியில் இருந்து விலகாமல், நிர்வாக பணியில் மட்டும் விலகி இருப்பார் என்றும், இதற்காக இடைக்கால செயற்குழு அமைக்கப்பட்டு, அதன் தலைவராக ஜக்மோகன் டால்மியா செயல்படுவார் என்றும் முடிவு எடுக்கப்பட்டுள்ளது.

மேலும், ஸ்ரீனிவாசன் நிர்வாகத்தில் தலையிடாமல், தொடர்ந்து தலைவர் பதவியில் நீடிப்பார் என்றும், கிரிக்கெட் வாரியத்தில் நிலவும் நெருக்கடியை சமாளிக்க சமரச முடிவுகள் எடுக்கப்பட்டுள்ளதாகவும் செய்திகள் தெரிவிக்கின்றன.

இடைக்கால தலைவராக அனைத்து செயற்குழு உறுப்பினர்களும் ஏகமனதாக தேர்வு செய்துள்ள ஜக்மோகன் டால்மியா, கொல்கத்தா கிரிக்கெட் சங்கத்தின் தலைவராகவும் உள்ளார்.

விகடன்.காம்