நற்குணம் நன்மை தரும்

by முழுமுதலோன் Wed Jun 05, 2013 4:01 pm

நற்குணம் நன்மை தரும்....அமுத மொழிகள்,

* உன்வாயிலாக இறைவன் ஒரு மனிதனுக்கு நேர்வழிகாட்டுவது இவ்வுலகத்தையும், இதிலுள்ள யாவற்றையும் விட உனக்கு நன்மை பயப்பதாகும்.

* மனிதர்கள் செய்த உதவியை சிந்திப்பதை விட இறைவன் செய்த உதவியை சிந்தனை செய்வீர்.

* நீங்கள் செய்த நன்மைகளை சிந்திப்பதை விட உங்களில் நிகழ்ந்த பாவங்களை சிந்தியுங்கள்.

* நீங்கள் உயிருடன் வாழப்போவதை சிந்திப்பதை விட (வருகின்ற) மரணத்தைப் பற்றி சிந்தியுங்கள்.

* உப்பை நீர் கரைப்பது போன்று, நற்குணம் பாவங்களைக் கரைத்துவிடும்; கள்ளின் மண்டி தேனைக் கெடுத்து விடுவது போன்று, துர்க்குணம் வணக்கங்களை கெடுத்துவிடும்.

* ஒருவன் ஒரு நன்மை செய்ய எண்ணி அதை அவன் செய்யவில்லையானால் அல்லாஹ் அதற்கு ஒரு நன்மையை பதிவு செய்கின்றான். நன்மை செய்ய எண்ணி அதை செய்தால் பத்து நன்மை முதல் எழுநூறு மடங்கு வரை அதையும் விட பல மடங்கு எழுதுகிறான்.

- நபிகள் நாயகம்

by முழுமுதலோன் Wed Jun 05, 2013 4:03 pm

நபிகள் நாயகம்(ஸல்) நவின்றார்கள்:

* பணியாட்களின் சக்திக்கு மிஞ்சிய வேலைப்பளுவை அவர்கள் மீது சுமத்த வேண்டாம். அவ்வாறு சுமத்த
நேரிட்டால், அந்த வேலையில் அவர்களுக்கு நீங்கள் துணைபுரியுங்கள்.

* பணியாளர்களை உபசரியுங்கள். நீங்கள் உண்பதில் இருந்து அவர்களுக்கும் உணவு அளியுங்கள்.

* உங்களில் ஒவ்வொருவரும் பொறுப்பாளர்களே!
உங்களுக்குக் கீழிருந்தவர்கள் குறித்து உங்கள் ஒவ்வொருவரிடமும் வினவப்படும். பணியாட்கள் தன் எஜமானனின் பொருட்களுக்கு பாதுகாவலன் ஆவான். அவர்களின் பொறுப்புகள் பற்றி விசாரிக்கப்படுவார்கள்.

* நாம் பொறுப்பில் அமர்த்தி உள்ள ஒருவர் நம்மிடமிருந்து ஓர் ஊசியை மறைத்தாலும் அல்லது அதைவிடச் சிறியதொரு பொருளை மறைத்தாலும் அதனை அவர்கள் அபகரித்துக் கொண்டார் என்றே பொருள். மறுமை நாளில் அதனைச் சுமந்த வண்ணம் வருவார்.

* ஒருவன் தன் கையால் உழைப்பதும் மோசடி செய்யாமல், பொய் பேசாமல் ஒருவன் நடத்தும் வாணிபமும் தான் யாவற்றிலும் சிறந்த சம்பாத்தியம்.

by முழுமுதலோன் Wed Jun 05, 2013 4:06 pm

கடனை திருப்பி செலுத்துங்கள்---அமுத மொழிகள்,

எவ்வளவு சம்பாதித்தாலும், அதற்கேற்ப தேவைகளும் அதிகரித்துக் கொண்டுதான் இருக்கிறது. தேவைகளை நிறைவேற்றுவதற்கு கடன் வாங்கத்தான் வேண்டியிருக்கிறது. எனவே, கடன் வாங்குவது தவிர்க்க முடியாத விஷயம். அப்படி கடன் வாங்கியிருந்தால், அதை உரிய காலத்தில் திருப்பிக் கட்டி விட வேண்டும். இல்லாவிட்டால், கடன்காரன் திட்டத்தான் செய்வான். நபிகள் நாயகத்தின் வாழ்விலும் இப்படி ஒரு சம்பவம் நடந்தது. நாயகம் ஒரு வணிகரிடம் கடன் வாங்கியிருந்தார். ஆனால், அதைத் திருப்பிச் செலுத்தவில்லை. ஒருநாள் தன் தோழர் உமருடன் அவர் தெருவில் நடந்து கொண்டிருந்த போது, அந்த வணிகர் அவரைப் பார்த்து விட்டார்.

""நீர் வாங்கிய கடன் என்னாயிற்று? ஏன் திருப்பித் தரவில்லை?'' எனக்கேட்டு நபிகள் நாயகத்தை காரசாரமாக திட்ட ஆரம்பித்து விட்டார். அவரது திட்டுதலை நாயகம் அமைதியாக கேட்டுக் கொண்டார். ஆனால் அவரது நண்பர் உமருக்கு கடுங்கோபம் வந்து விட்டது. ஒரு கட்டத்தில் அவர் வணிகரை அடிக்கவே பாய்ந்து விட்டார். அப்போது நாயகம் அவரைத் தடுத்தார். அவர் உமரிடம், ""தோழரே! தாங்கள் செய்வது சரியல்ல! கொடுத்த கடனை அவர் திருப்பிக் கேட்கிறார். நான் அவருக்கு கொடுக்காமல் இருந்ததற்காக என்னைத்தான் நீர் கண்டித்திருக்க வேண்டும்,'' என்றார். அவரது பதிலைக்கேட்ட உமர் அமைதியாக நின்றார். நபிகள் நாயகத்தின் இந்த பதிலை சற்றும் எதிர்பாராத வணிகர், தான் அவரை திட்டியதற்கு வருந்தினார். அண்ணலாரிடம் மன்னிப்பும் கேட்டார். வாங்கிய கடனைத் திருப்பிச் செலுத்தி விட வேண்டும் என்பதில் நபிகள் நாயகம் உறுதியைக் கடைபிடித்தார். கடன் வாங்கியவர்கள் அதனை வாங்கும்போது இருந்த அக்கறையை விட, அதøனை திருப்பி செலுத்துவதில் அதிக அக்கறை கொண்டிருக்க வேண்டும் என்பதை நபிகள் நாயகம் வாழ்வில் நடந்த இந்நிகழ்ச்சி எடுத்துக்காட்டுகிறது.
ஜூம்ஆ தொழுகை
"ஜூம்ஆ' என்றால் வெள்ளிக்கிழமை. இந்த நாள் ஒரு இனியநாள். ஏனெனில், அன்று அல்லாஹ் நரகத்தில் வசிக்கும் ஆறுலட்சம் பேரை விடுதலை செய்கின்றான். ஆகவே, அன்றைய தொழுகைமிகவும் முக்கியமானதாகிறது. யார் ஒருவர், மூன்று வெள்ளிக்கிழமைகளில் காரணமின்றி தொழாமல் இருந்து விடுகிறாரோ, அவரை முனாபிக் (நயவஞ்சகன்) என்கிறார் நபிகள் நாயகம். ஒவ்வொரு நாளும் வானத்தின் மத்தியில் சூரியன் வரும்போது, நரகம் எரிக்கப்படுகின்றது. அந்நேரத்தில் எந்த தொழுகையையும் தொழக்கூடாது. ஆனால், வெள்ளிக்கிழமைகளில் மட்டும் நரகம் எரிக்கப்படுவதில்லை. எனவே, அந்நாளில் மதியம் தொழுகை செய்யலாம். வெள்ளிக்கிழமை தொழுகையை விடாமல் கடைபிடிக்க வேண்டும்.
கடமைக்காக தொழலாமா?
நபிகள்நாயகம் மூதேவிகளுக்கு ஐந்து அடையாளங்கள் இருப்பதாகச் சொல்கிறார். அவை,
1. ஆலிம் உலமாக்களை (மார்க்க பேரறிஞர்கள்) விட்டு விலகியிருப்பவர்கள்.
2. மார்க்கத்திற்கு விரோதமாக தங்கள் பலத்தை செலவிடுபவர்கள்.
3. கடமைக்காக தொழுபவர்கள்.
4. பேச்சில் பொய்யை நிறைப்பவர்கள்
5. பொருள் சேகரிக்கும் ஆசையைத் தவிர வேறெதுவும் இல்லாதவர்கள்.
இந்த குணங்கள் உங்களிடம் இருந்தால் அவற்றை கைவிட்டு, மூதேவியிடமிருந்து உங்களைக் காத்துக் கொள்ளுங்கள்.

Posted by Mohamed Ali ப்ளாக்

by முழுமுதலோன் Wed Jun 05, 2013 4:10 pm

நபிகளின் நல்லுரைகள்

அழிவில்லாத கல்வி
* சன்மார்க்க கல்வி கற்பது ஒவ்வொரு முஸ்லிம் ஆண் பெண் மீதும் கட்டாயக் கடமையாகும்.

* மார்க்க கல்வியை கற்றுக் கொள்வதற்காக எவர் ஒரு ஊருக்கு புறப்பட்டு விடுகிறாரோ அவர் அதனைக் கற்று மீண்டும் ஊர் திரும்பும்வரை சன்மார்க்க வழியில் ஈடுபட்டவராகவே கருதப்படுவார்.

* இஸ்லாத்தை உயிர்ப்பிப்பதற்காக ஒருவன் கற்றுக்கொண்டு வரும்
சமயத்தில் மரணித்து விடுவானேயானால் சொர்க்கத்தில் நபிமார்களுடன் இருக்கும் நற்பதவியை கிடைக்கப் பெற்றவனாகிவிடுகிறான்.

* மார்க்கக்கல்வியை தேடிப்புறப்பட்டவர் திரும்பும் வரை அல்லாஹ்வின் பாதையில் இருக்கிறார்.

* மனிதன் கல்விக்காக செய்கிற தருமம் அவன் மரணித்த பிறகும் நன்மை பொழியும்.

* கற்றுக்கொடுப்பவரும் கற்றுக் கொள்பவரும் நேர்வழியில் இருக்கின்றனர். இந்த நிலை அற்றவர்களிடம் எந்த நல்வழியுமில்லை.

* அல்லாஹ்வின் சேவைக்கல்லாமல் (உலக வாழ்வின்) நோக்கத்திற்காக கல்வி கற்பவன் நரகத்தை இருப்பிடமாகக் கொள்ளட்டும்.

* எந்த ஒரு அடியானை இறைவன் இழிவுபடுத்த விரும்புகிறானோ அவனை மார்க்க கல்வியை கற்றுக்கொள்வதை விட்டு நீக்கி விடுகிறான்.

* மார்க்க கல்வி நபிமார்களின் உரிமைப் பொருள். செல்வம் பிர்அவ்னின் உரிமைப் பொருள். அதிகமாக வணக்கம் புரிவதைவிட அறிவை அதிகமாக்கிக் கொள்வதே மேலாகும்.

* கல்விக்கு அழிவே இல்லை. அதுபோன்று அதற்காக கொடுக்கும் பொருளுக்கும் அழிவே இல்லை.

* எனக்குப்பின் மார்க்கக்கல்வி வெகுவிரைவில் அகன்றுவிடும். பின்பு குழப்பங்கள் வெளிப்பட்டுவிடும். அறியாமை மிகைத்துவிடும். அதனால் மக்கள் மத்தியில் கட்டாயக் கடமையான விஷயங்களில் கூட (சண்டை) சச்சரவுகள் உண்டாகிவிடும். அவர்களை சமாதானம் செய்து வைக்கும் அளவுக்கு அறிவுள்ளவர் அப்போது இருக்கமாட்டார்கள்.

* எனது உம்மத்தினரை நாசப்படுத்தும் வஸ்துக்கள் இரண்டு; 1. கல்வி கற்பதை விட்டுவிடுவது 2. பொருள்களை சேர்ப்ப தில் முழு நேரத்தையும் செலவு செய்வது.

* நம்மிடத்தில் ஒரு ஹதீஸை அல்லது ஒரு சட்டத்தைக் கேட்டு அறிந்து கொள்வது ஆயிரம் ரகஅத் நபில் தொழுவதை விட மேலானதாகும். ஏனென்றால் அவர் மார்க்க கல்வி கற்கும் நிலையில் அவருக்கு மரணம் வருமேயானால் (ஷஹீதாக) வீரத்தியாகியாக மரணிக்கிறார்.

* உங்களுக்கு மார்க்க கல்வியை கற்றுக் கொடுத்தவரை கண்ணியப்படுத்துங்கள்.

* அல்லாஹ்வின் சேவைக்கு அல்லாமல் வேறு (உலக வாழ்வின்) நோக்கத்திற்காக கல்வி கற்பவன் நரகத்தையே தன் இருப்பிடமாகக் கொள்வான்.

by முழுமுதலோன் Wed Jun 05, 2013 4:13 pm

by முழுமுதலோன் Wed Jun 05, 2013 4:16 pm

குர்ஆனின் நற்போதனைகள்…

உண்மை பேசுக!

அல்லாஹ், “இது உண்மை பேசுபவர்களுக்கு அவர்களுடைய உண்மை பலனளிக்கும் நாளாகும். கீழே சதா நீரருவிகள் ஒலித்தோடிக் கொண்டிருக்கும் சுவனபதிகள் அவர்களுக்குண்டு, அவற்றில் அவர்கள் என்றென்றும் இருப்பார்கள். 5:119

நேர்மையாக பேசுக!

ஈமான் கொண்டவர்களே! நீங்கள் அல்லாஹ்வுக்கு அஞ்சுங்கள்; (எந்நிலையிலும்) நேர்மையான சொல்லையே சொல்லுங்கள்.

அழகானதைப் பேசுக!

பெற்றோருக்கும், உறவினர்களுக்கும், அநாதைகளுக்கும், மிஸ்கீன்(களான ஏழை)களுக்கும் நன்மை செய்யுங்கள்; மனிதர்களிடம் அழகானதைப் பேசுங்கள். 2:83

கனிவாகப் பேசுக!

உறவினர்களோ, அநாதைகளோ, ஏழைகளோ வந்து விடுவார்களானால் அவர்களுக்கும் அ(ச்சொத்)திலிருந்து வழங்குங்கள்;. மேலும் அவர்களிடம் கனிவான வார்த்தைகளைக் கொண்டே பேசுங்கள். 4:8

நியாயமாகப் பேசுக!

நீங்கள் பேசும்பொழுது அதனால் பாதிக்கப்படுபவர் நெருங்கிய உறவினராக இருந்த போதிலும் – நியாயமே பேசுங்கள். 6:152

அன்பாகப் பேசுக!

அண்டை வீட்டிலுள்ள உறவினர்களுக்கும், அருகிலுள்ள அண்டை வீட்டாருக்கும், (பிரயாணம், தொழில் போன்றவற்றில்) கூட்டாளிகளாக இருப்போருக்கும், வழிப்போக்கர்களுக்கும், உங்களிடமுள்ள அடிமைகளுக்கும் அன்புடன் உபகாரம் செய்யுங்கள்;. நிச்சயமாக அல்லாஹ் கர்வமுடையோராக, வீண் பெருமை உடையோராக இருப்பவர்களை நேசிப்பதில்லை. 4:36

வீண் பேச்சை தவிர்த்துடுக!

நம் வசனங்களைப் பற்றி வீண் விவாதம் செய்து கொண்டிருப்போரை நீர் கண்டால், அவர்கள் அதைவிட்டு வேறு விஷயங்களில் கவனம் செலுத்தும் வரையில் நீர் அவர்களைப் புறக்கணித்து விடும். 6:68

பொய் பேசாதீர்!

உங்கள் நாவுகள் (சில பிராணிகள் பற்றி) பொய்யாக வர்ணிப்பது போல், இது ஹலாலானது, இது ஹராமானது என்று அல்லாஹ்வின் மீது பொய்யை இட்டுக்கட்டாதீர்கள் – நிச்சயமாக, எவர் அல்லாஹ்வின் மீது பொய்யை இட்டுக்கட்டுகிறார்களோ அவர்கள் வெற்றியடைய மாட்டார்கள். 16:116

புறம் பேசாதீர்!
உங்களில் சிலர் சிலலைப் பற்றிப் புறம் பேசவேண்டாம். 49:12

ஆதாரமின்றி பேசாதீர்!

யாதோர் ஆதாரமுமின்றி, அல்லாஹ்வின் வசனங்களைப் பற்றித் தர்க்கம் செய்வது, அல்லாஹ்விடத்திலும் ஈமான் கொண்டவர்களிடத்திலும் மிகவும் வெறுக்கப்பட்டதாகும். 40:35

அவதூறு பேசாதீர்!

எவர்கள் முஃமினான ஒழுக்கமுள்ள, பேதை பெண்கள் மீது அவதூறு செய்கிறார்களோ, அவர்கள் நிச்சயமாக இம்மையிலும், மறுமையிலும் சபிக்கப்பட்டவர்கள்; 24:23