மோசமாக ஆடினாலும் ரோகித்சர்மா, ஜடேஜாவுக்கு கேப்டன் டோனி ஆதரவு

இந்தியா, இலங்கை, நியூசிலாந்து ஆகிய 3 நாடுகள் கிரிக்கெட் போட்டி இலங்கையில் நடைபெற்று வருகிறது.

ஒவ்வொரு அணியும், மற்ற அணிகளுடன் தலா 2 முறை மோதவேண்டும். புள்ளிகள் அடிப்படையில் முதல் இரண்டு இடங்களை பிடிக்கும் அணிகள் இறுதிப்போட்டிக்கு தகுதி பெறும்.

இதுவரை 5 “லீக்” ஆட்டம் முடிந்துவிட்டது. இலங்கை அணி இறுதிப்போட்டிக்கு தகுதி பெற்றுள்ளது.

கடைசி “லீக்” ஆட்டம் இன்று நடக்கிறது. இதில் இந்தியா- நியூசிலாந்து அணி கள் மோதுகின்றன. இதில் வெற்றி பெற்றதால் தான் இந்தியா இறுதிப்போட்டிக்கு தகுதி பெற முடியும் என்ற நிலை உள்ளது.

இந்தப்போட்டித் தொடரில் ரோகித்சர்மா, ரவிந்திரஜடேஜா ஆகியோரது ஆட்டம் மிகவும் மோசமாக உள்ளது. இதனால் இருவரும் அணிக்கு தேர்வு பெறுவது மிகுந்த சர்ச்சையை ஏற்படுத்தியது.

ஆனால் இந்த இருவருக்கும் கேப்டன் டோனி தனது ஆதரவை தெரிவித்து உள்ளார். இது தொடர்பாக அவர் கூறியதாவது:-

கடந்த 1 1/2 ஆண்டுகளாக ஜடேஜாவின் பந்து வீச்சை பார்த்து வருகிறேன். ஒரு சில போட்டிகளில் தான் அவர் மோசமாக பந்து வீசுகிறார். ஆனால் பெரும்பாலான போட்டிகளில் அவர் சிறப்பாகவே பந்து வீசுகிறார். அவரது பேட்டிங் சிறப்பாக இல்லாவிட்டாலும் பங்களிப்பு உள்ளது.

இதனால் அவர் அணிக்கு 5-வது பவுலராக உள்ளார். ஆல் ரவுண்டர் என்று சொல்ல முடியாவிட்டாலும் 50 ஓவர் அவரால் வீச முடியும்.

ரோகித் சர்மாவுக்கு இது நெருக்கடியான காலம். அவர் பெரும்பாலும் அணிக்கு வெளியே தான் இருக்கிறார். ஆடுகளம் நடுவரின் தீர்ப்பு அவருக்கு சாதகமாக அமைய வில்லை.

2 ஆட்டத்தை வைத்து கொண்டு மோசமாக ஆடுகிறார் என்று கூறிவிட முடியாது. அவர் கடினமாக முயற்சிக்கிறார். உடல் தகுதியிலும் முன்னேற்றம் அடைந்து உள்ளார். அவர் மிகப்பெரிய ஸ்கோரை எடுப்பார் என்ற நம்பிக்கை உள்ளது.

2 போட்டியில் நமது பேட்டிங் மிகவும் மோசமாக இருந்தது. இன்றைய ஆட்டத்தில் பேட்டிங்கில் நல்ல நிலை பெறுவோம் என்ற நம்பிக்கையில் உள்ளோம். மிகவும் சிறப்பாக ஆடுவோம்.

இவ்வாறு அவர் கூறினார்.

இந்திய அணி எழுச்சி பெறும் வகையில் ஆடும் என்று நியூசிலாந்து கேப்டன் ரோஸ் டெய்லர் தெரிவித்து உள்ளார்.