உத்தரகாண்ட் வெள்ளம்: 2 ஆயிரம் பேரை செல்போன் உதவியால் மீட்ட வாலிபர்

மராட்டிய மாநிலத்தை சேர்ந்த சுற்றுலா பயணிகள் 2 ஆயிரம் பேர் உத்தரகாண்ட் மாநிலத்துக்கு சுற்றுலா சென்றனர். அங்கு ஏற்பட்ட வெள்ளப் பெருக்கு காரணமாக ஜங்கிள் சாட்டி பகுதியில் அனைவரும் சிக்கிக் கொண்டனர்.

பெரு வெள்ளத்தால் அந்த பகுதி துண்டிக்கப்பட்டது. சாலையும் முற்றிலும் சிதைந்து விட்டது. இதனால் 2 ஆயிரம் பேரும் அங்கு தவித்தனர். தங்களை மீட்க மீட்பு படையை எதிர்பார்த்து காத்திருந்தனர். ஆனால் அவர்கள் அங்கு சிக்கி இருப்பதை மீட்பு படைக்கு எப்படி தெரிவிப்பது என்பது தெரியாமல் குழம்பினார்கள்.

அப்போது சுற்றுலாப் பயணிகளில் ஒருவரான ஜெயேஷ் பாங்டியா என்ற வாலிபர் புத்திசாலித்தனமாக செயல்பட்டார். தாங்கள் சிக்கியுள்ள பகுதியின் வரைபடத்தை ஒரு வெள்ளைத்தாளில் வரைந்தார். பின்னர் அதை தனது செல்போன் கேமராவில் படம் பிடித்தார். அதை உத்தரகாண்ட் தலைநகர் டேராடூனில் உள்ள தனது நண்பருக்கு அனுப்பி வைத்தார்.

அந்த வரைபடத்தை அவர் போலீஸ் ஐ.ஜி. ராம்சிங்மீனாவை சந்தித்து கொடுத்து ஜங்கிள் சாட்டி பகுதியில் 2 ஆயிரம் பேர் வெள்ளத்தில் சிக்கி தவிப்பதாக கூறினார். ராம்சிங்மீனா அந்த வரைபடத்தை மீட்பு பணியில் ஈடுபட்டிருந்த ராணுவ வீரர்களுக்கும், போலீசாருக்கும் அனுப்பி வைத்தார்.

இதையடுத்து வரை படத்தில் இருந்த பகுதிக்கு மீட்பு படையினர் ஹெலிகாப்டரில் சென்றனர். பசியால் தவித்த சுற்றுலா பயணிகளுக்கு உணவு பொட்டலங்களை வீசினார்கள். பின்னர் 2 ஆயிரம் பயணிகளையும் பத்திரமாக மீட்டனர்.

-- மாலைமலர்