இந்தியா மீது மீண்டும் தாக்குதல் நடத்தப்பட்டால் இந்தியா-பாகிஸ்தான் இடையே முழுஅளவிலான 4-வது போர் மூளும்

இந்தியா மீது மீண்டும் தாக்குதல் நடத்தப்பட்டால் இந்தியா-பாகிஸ்தான் இடையே முழுஅளவிலான 4-வது போர் மூளும்
மும்பை பாணியில் இந்தியா மீது மீண்டும் தாக்குதல் நடத்தப்பட்டால், இந்தியா தனது எல்லையோரம் உள்ள பாகிஸ்தான் தீவிரவாத முகாம்களை அழிக்கும். அதனால், இந்தியா-பாகிஸ்தான் இடையே முழுஅளவிலான 4-வது போர் மூளும். அதில், அணுகுண்டுகளும் பயன்படுத்தப்படும் வாய்ப்பு உள்ளது என்று அமெரிக்க தீவிரவாத எதிர்ப்பு நிபுணர் பீட்டர் பெர்ஜன் கூறினார்.

அமெரிக்க பாராளுமன்றத்தின் உள்நாட்டு பாதுகாப்பு கமிட்டி, தீவிரவாத வளர்ச்சி குறித்து விசாரணை நடத்தியது. அமெரிக்க தீவிரவாத எதிர்ப்பு நிபுணர் பீட்டர் பெர்ஜன், அக்கமிட்டி முன்பு ஆஜராகி சாட்சியம் அளித்தார்.

அவர் கூறுகையில், இந்தியாவில் மும்பையில் நிகழ்த்திய தாக்குதலைப் போல மீண்டும் தாக்குதலை நடத்தி நூற்றுக்கணக்கானோரை கொல்ல பாகிஸ்தான் பயங்கரவாதிகள் திட்டமிட்டுள்ளனர். இந்தத் தகவல் நம்பகத்தனமானது என்றும், சாதாரணமாக எடுத்துக் கொள்ள வேண்டாம் என்று பீட்டர் பெர்கென் அறிவுறுத்தினார்.

பாகிஸ்தானில் புகலிடம் அடைந்துள்ள பயங்கரவாதிகள், இந்தியாவின் முக்கியமான நகரங்களில் தாக்குதல் நடத்த வாய்ப்புள்ளது. தாக்குதல் நடத்தினால் அதில் நூற்றுக்கணக்கானோர் மடிய வேண்டும் என்பதே அவர்களின் குறிக்கோளாக உள்ளது என்றும் அவர் தெரிவித்தார். அவர் மேலும் கூறியதாவது:-

மும்பை தாக்குதல் நடந்த போது இந்திய மக்கள் மத்தியில் கொந்தளிப்பு ஏற்படவில்லை. அவர்கள் பொறுமை காத்தனர். அவர்கள் அரசுக்கு எவ்வித நெருக்கடியும் கொடுக்கவில்லை. ஆனால் பாகிஸ்தான் பயங்கரவாதிகள் மீண்டும் தாக்குதல் நடத்தினால் இந்திய மக்கள் பொறுத்துக் கொள்ளமாட்டார்கள், பாகிஸ்தான் பயங்கரவாதிகளுக்கு தகுந்த பாடம் புகட்டுமாறு அரசுக்கு கடும் நெருக்குதல் அளிப்பார்கள். அப்படி மக்கள் அளிக்கும் நெருக்குதலால் இந்திய அரசும் பயங்கரவாதிகளுக்கு எதிராக ஏதாவது ஒரு உறுதியான முடிவை எடுக்கும். பெரும்பாலும் பாகிஸ்தான் எல்லையையொட்டியுள்ள பயங்கரவாத பயிற்சி முகாம்களை அடியோடு அழிக்கும் முடிவாக அது இருக்கலாம்.

பாகிஸ்தான் எல்லையையொட்டியுள்ள பயங்கரவாத பயிற்சி முகாம்களை இந்தியா அழிக்க நடவடிக்கை எடுத்தால் நிச்சயம் பாகிஸ்தான் கோபம் அடைய வாய்ப்புள்ளது. அதனால் இரு நாடுகளிடையே மீண்டும் போர் மூளும் வாய்ப்பும் உள்ளது. அப்படி போர் மூண்டால் இரு நாடுகளும் தத்தமது வல்லமையை நிரூபிக்க வகையில் அணு ஆயுதத்தை களத்தில் இறக்கும் அபாயம் உள்ளது. இதனால் இந்தியாவின் மீது பயங்கரவாதிகள் மீண்டும் தாக்குதல் நடத்த திட்டமிட்டுள்ளது என்பது அந்நாட்டுக்கு மட்டும் அச்சமான, துயரமான தகவல் கிடையாது. ஒட்டுமொத்த மனித சமுதாயத்துக்கே வருத்தமான தகவல். இவ்வாறு பீட்டர் பெர்கென் கூறினார்.