பருவப் பெண்களின் தாய்மார்களுக்கு...

பெண்கள் முகத்தில் ஏற்படும் பருக்கள், எண்ணெய் பசையுள்ள தோல் மற்றும் ஹார்மோன் மாறுபாடுகளால் ஏற்படக்கூடிய சாதாரண ஒரு நிகழ்வே. ஆனால், "டீன்ஏஜ்' பெண்கள் இதை ஒரு நோய் போல கருதுவர்.

பெண்களின் வாழ்க்கையில், "டீன் ஏஜ்' என்பது வசந்த காலம் போன்றது. பொதுவாக, 13, 19 வயது வரையிலான பருவத்தை, "டீன் ஏஜ்' என்கிறோம். இந்தியாவில், 25 கோடிக்கும் அதிகமாக டீன் ஏஜ் பெண்களின் எண்ணிக்கை உள்ளது. இக்காலகட்டத்தில் பெண்கள் உடல் ரீதியாகவும், மன ரீதியாகவும் பல மாறுதல்களை சந்திக்கின்றனர். அதனால், பெற்றோராகிய நீங்கள், குழந்தைப் பருவத்தில் எவ்வளவு அக்கறையோடு கவனித்தீர்களோ அதே போல், இப்பருவத்திலும் அவர்களை கவனிக்க வேண்டியது அவசியம்.


டீன் ஏஜ் பெண்களுக்கு ஏற்படும் பிரச்னைகள் சில...

* பூப்பெய்துவதில் சில குழந்தைகளுக்கு கால தாமதம் ஏற்படலாம். உடல் உறுப்பு வளர்ச்சி சரியாக இருந்தால், 16 வயது வரை பொறுத்திருந்து பார்க்கலாம். அப்படி இல்லையெனில், மருத்துவரை அணுகுவது நல்லது.

* சிலருக்கு முகத்தில் பருக்கள் ஏற்படும். இது, எண்ணெய் பசையுள்ள தோல் மற்றும் ஹார்மோன் மாறுபாடுகளால் ஏற்படக் கூடிய சாதாரண ஒரு நிகழ்வே. ஆனால், "டீன் ஏஜ்' பெண்கள் இதை ஒரு நோய் போல கருதுவர். எனவே, இது குறித்து, பெற்றோர் தங்கள் குழந்தைகளுக்கு தெளிவாக விளக்க வேண்டும்.

* பெண்களுக்கு, தன் சுத்தம் பேணுவது பற்றி தாய்மார்கள் எடுத்துக் கூற வேண்டியது அவசியம். நோய் தொற்று வராமல் இருப்பதற்கு சுகாதாரம் மிக முக்கியம். அவர்கள் பயன்படுத்தும் உள்ளாடைகள் குறித்து, கவனமுடன் இருக்க அறிவுறுத்த வேண்டும்.

* இப்பருவத்தில், உடல் உறுப்பு வளர்ச்சி மாற்றத்தால், உணர்வுப்பூர்வமாக பலவித மன உளைச்சலுக்கு அவர்கள் ஆளாவதால், தாய்மார்கள் தங்கள் பெண் குழந்தைகளுக்கு, அவர்களது உடல் வளர்ச்சி குறித்தும், வெளியிடங்களில் எப்படி பாதுகாத்துக் கொள்ள வேண்டும் என்பது பற்றியும் கூற வேண்டும்.

* வேலைக்கு செல்லும் தாய்மார்கள் தங்களின் டீன் ஏஜ் பெண்களுடன், தினமும் சிறிது நேரம் செலவழிக்க வேண்டும். அவர்களது உடல்நலம், சந்தேகங்கள், படிப்பு பற்றி மனம் விட்டு பேச வேண்டும். இது, அவர்களிடம் தன்னம்பிக்கையை வளர்ப்பதுடன் தாயுடனான நெருக்கத்தையும், பாசத்தையும் மேம்படுத்தும்.

* இந்த வயதுக்குரிய பல்வேறு பிரச்னைகளால், டீன்- ஏஜ் குழந்தைகள், பொதுவாக அதிகம் சாப்பிட மாட்டார்கள். இதனால், ரத்த சோகை ஏற்பட வாய்ப்புண்டு. இவற்றை சரிப்படுத்துவதுடன், ஹீமோகுளோபின் அளவை, 10க்கு மேல் வைத்துக் கொண்டால், படிப்பில் முன்னேற்றம், வேலையில் சுறுசுறுப்பு, ஆரோக்கியம் மேம்படும்.

- ஐடியா அம்புஜம்

பயனுள்ள பதிவு