அண்ணாகண்ணனின் அகமொழிகள்

நன்றி மின்னஞ்சல் வழியே - அண்ணா கண்ணன்.

பொருள்களில் பயனுள்ளவை, பயனற்றவை கிடையாது; பயனறிந்தவை, பயனறியாதவையே உண்டு. (அகமொழி 818)

நினைவாற்றலை முதன்மைப்படுத்திய கல்வி முறை; ஆனால், மறதி நிறைந்த மக்கள். காரணம், குறுகிய கால நினைவாற்றலே இதன் தேர்வுகளுக்குப் போதுமானதாய் இருக்கிறது. (அகமொழி 819)

இன்னின்ன பங்குகளின் மதிப்பு ஏறும் - இறங்கும் என்று கணிக்கும்
நிபுணர்கள், அவ்வாறு நிகழாவிடில் தாங்கள் பொறுப்பு ஏற்பதில்லை. பருவ நிலை
இவ்வாறு மாறும் என முன்னறிவிக்கும் வானிலை ஆய்வாளர்கள், அவ்வாறு
நிகழாவிடில் தாங்கள் பொறுப்பு ஏற்பதில்லை. உங்கள் வாழ்வில்
இப்படியெல்லாம் நடக்கும் எனப் பலன் சொல்லும் சோதிடர்கள், அவ்வாறு
நிகழாவிடில் தாங்கள் பொறுப்பு ஏற்பதில்லை. எதிர்காலத்தின் மீது நடக்கும்
சூதாட்டத்தில் இழப்பு என்னவோ, இந்த நிபுணர்களை நம்பி முடிவுகள்
எடுப்பவர்களுக்கே. ஒரு நம்பகமான அமைப்பை உருவாக்கி, இந்த நிபுணர்களின்
ஒவ்வொரு கணிப்பிற்கும் மதிப்பெண் கொடுக்கலாம். அதன் மூலம் இவர்களின்
வெற்றி விழுக்காட்டினைக் கண்டறியலாம். அதன் முலம் வெற்றிகரமான
கணிப்பாளருக்கான தர வரிசையை உருவாக்கலாம். அப்போது, சூதாட்டம் இன்னும்
சிறப்பாக நடக்கும். (அகமொழி 303)