கொஞ்சம் பக்கத்துலதான் வாயேன்டி!

(தனக்கும் ஆசை இருந்தாலும் கணவனைக் கொஞ்ச நேரம் கெஞ்ச விட்டு வேடிக்கைப் பார்க்க ஆசைப்பட்டு போலிக் கோபமான ஊடல் புரியும் மனைவியைக் கோபித்தும்,கொஞ்சியும், கெஞ்சியும் கொஞ்சம் கொஞ்சமாய் இணங்க வைக்க ஒரு கணவன் படுகிற பாடு...)

என்னடி ஆச்சு இப்போ?
எதுக்குடி இந்தக் கோவம்?
மூஞ்சிய தூக்கி வச்சி
மொறைக்கநான் செஞ்சதென்ன?

மல்லிகப் பூவ நானும்
மொழமொரு மூணு வாங்கி
அள்ளியே அணைக்க வந்தா
அங்கிட்டுப் போறதென்ன?

நேசமா கையத் தொட்டு
நெருக்கமா பேச வந்தா
தோஷமா வந்து சேரும்
தொலவாநீ போறதென்ன?

நாக்கோட எச்சி ஊறி
நான்கொஞ்ச நெருங்குறப்போ
மூக்கோட கோவம் வந்து
முக்காலி கொள்வதென்ன?

மேல்மூச்சு வாங்க, சொர்க்க
மேலோகம் போற நேரம்
வேல்பாச்சும் பார்வ பாத்து
வேதன செய்வதென்ன?

மல்லிக கமகமக்க
மனசுந்தான் கனகனக்க
துள்ளியே பக்கம் வந்தா
தொரத்தித்தான் விடுவதென்ன?

வீட்டுக்கு வெலக்கு கூட
நேத்திக்கே முடிஞ்சி போச்சே
கூட்டுக்கு மாமன் வந்தா
கொலவாம போறதென்ன?

உச்சிக்கி நெலவு கூட
வந்துடும் போலிருக்கே -உன்
எச்சிக்கி எச்சி ஊறி
ஏக்கம்தான் கூடிப்போச்சே!

கொசுவத்து வாசம் வந்து
கண்ணேஎன் மனச இப்போ
கொசுவாட்டம் கடிக்குதேடி
கண்தூக்கம் கெடுக்குதேடி!

மகராசன் கர்ணன் கையி
கொடுக்காம அரிச்சதுபோல்
மகராணி தேகம் கூட
மாட்டாம தவிக்குறேன்டி!

ஆனாலும் இந்தக் கோவம்
ஆகாது பொம்பளைக்கு
நானாழம் பாத்து நின்னா
என்னாகும் நெனச்சுக்கோடி!

போதும்டி சிறுக்கி, கொஞ்சம்
புருஷனத் திரும்பிப் பாரேன்!
பாதத்த இங்க தாடி
பதமாநான் புடிச்சித் தாரேன்!

ராசாத்தி! அடிராசாத்தி!
ரம்பைக்கி அக்காகாரி!
நீசாத்து கதவக் கொஞ்சம்
நெஞ்சினியும் தாங்காதாத்தா!

போலியா நடிச்சி என்ன
படுத்தினதெல்லாம் போதும்
தூளிய நல்லா ஆட்டு
தூங்கிருச்சா பாரு புள்ள!

இதுஎன்ன பொழப்போ, ராவு
வந்தாபேய் புடிச்சி போது!
அதுக்காகப் பொம்பளைங்க
இப்படியா படுத்துவீங்க?

உணர்ச்சிய பொம்பளைக்கு
அதிகமா வச்ச சாமி
ஆசைய அதுக்கு மேல
ஆம்பளைக்கு வச்சிப்புட்டான்!

வெட்கத்த பொம்பளைக்கு
வேலியா போட்ட சாமி
வேகத்த ஆம்பளைக்கு
வெனையாக வச்சிப்புட்டான்!

வெட்கத்த உங்களுக்கு
வெக்காம விட்டிருந்தா
கக்கத்துல இல்ல நாங்க
உங்கள வச்சிருப்போம்!

கோவிக்க வேண்டாம் தாயி
கன்னத்துல போட்டுக்குறேன்!
காவிக்குத் துணிச்சல் இல்ல -உன்
காலுக்கே தெண்டனிட்றேன்!


---------------ரௌத்திரன்

ரௌத்திரன் அவர்களின் இந்த கவிதை அவரை ஒரு சிறந்த கவிஞர் என காட்டுகிறது. கவிதை வரிகள் அருமை. பகிர்வுக்கு நன்றி ரௌத்திரன்

உங்கள் தலைப்புகளை தேடி வாசித்தேன்.
ரௌத்திரன் சும்மா சொல்லவில்லை
வார்த்ததைகளும் வாழ்க்கையும்
உங்கள் வரிகளில் வார் பிடித்து விளையாடுது !

மிக்க நன்றி தோழர் ஸ்ரீராம் மற்றும் தமிழினியவன் இருவருக்கும்! ----------ரௌத்திரன்

ரசனை மிக்க வரிகள்.

மிக்க நன்றி தோழர் செந்தில்! --------ரௌத்திரன்

உங்கள் கவிதையை ஆசையாய் வாசிக்கும் என் மனது

நீங்கள் என் எழுத்தின் மீது வைத்துள்ள மதிப்பை நான் நன்கு அறிவேன் தோழரே! நன்றி!

திரைக்கதை மன்னனால் முதல் பாடலுக்கு சம்பளமும் வாங்கினேன். ஆனால், விதியோ அல்லது சதியோ பாடல் படத்திலே இடம்பெறவில்லை. மீண்டும் முயன்றுகொண்டு இருக்கிறேன்.
எனது எழுத்துகளை தொடர்ந்து வாசிக்க http://poetrowthiran.blogspot.in/ நன்றி!

திரைப்படம் என்பது மிகப்பெரிய துறை... பெரிய மனிதர்களின் அரவணைப்பு தேவை... நமக்கெல்லாம் அது விரைவில் கிடைத்துவிடாது. முயன்றுகொண்டேயிருங்கள்...

காதல் ரசம் சொட்டும் அருமையான கவிதை! பாராட்டுக்கள்!

மிக்க நன்றி தோழர்! ----------ரௌத்திரன்