தண்டவாளத்தில் படுத்து உயிர் தப்பிய பெண்.

by ஸ்ரீராம் Sat Mar 22, 2014 11:31 am

சென்னை,

பெரம்பூர் ரெயில் நிலையத்தில் செல்போனில் பாட்டு கேட்டபடி தண்டவாளத்தை கடந்த பெண், திடீரென மின்சார ரெயில் வந்ததால் தண்டவாளத்தின் நடுவில் படுத்து உயிர் தப்பினார். பெரம்பூர் ரெயில் நிலையத்தில் இந்த சம்பவம் பரபரப்பை ஏற்படுத்தியது.

செல்போனில் பாட்டு

சென்னை அம்பத்தூர் புதூர், மெயின் நகர், அன்பழகன் தெருவை சேர்ந்தவர் மோகன்குமார். இவருடைய மகள் சகானாதேவி (வயது 25). இவர், பெரம்பூர் ஜமாலியா பகுதியில் உள்ள ஒரு தனியார் நிறுவனத்தில் வேலை செய்து வருகிறார். தினமும் மின்சார ரெயிலில் அலுவலகம் வந்து செல்வார்.

இன்று காலை வழக்கம்போல் சகானாதேவி, அம்பத்தூர் ரெயில் நிலையத்தில் இருந்து மின்சார ரெயிலில் சென்னை பெரம்பூர் ரெயில் நிலையம் வந்திறங்கினார். அங்கிருந்து ஜமாலியா பகுதிக்கு செல்ல தண்டவாளத்தை கடந்து சென்றார். அப்போது அவர் செல்போன் இணைப்பை காதில் மாட்டி பாட்டு கேட்டபடி நடந்து சென்றார்.

தண்டவாளத்தில் படுத்தார்

அப்போது சகானா நடந்து சென்ற தண்டவாளத்தில் சென்னை சென்டிரலில் இருந்து ஆவடி நோக்கி மின்சார ரெயில் வேகமாக வந்து கொண்டிருந்தது. செல்போனில் பேசியபடி வந்த சகானாதேவி, ரெயில் வருவதை கவனிக்கவில்லை. இதை பார்த்த மற்ற பயணிகள் கூச்சலிட்டு சகானாதேவியை எச்சரித்தனர். ஆனால் அதையும் அவர் கவனிக்காமல், ரெயில் மிக அருகில் வந்ததைப் பார்த்த அதிர்ச்சி அடைந்தார்.

இதனால் செய்வதறியாது திகைத்த சகானாதேவி, கண் இமைக்கும் நேரத்தில் சுதாரித்துக்கொண்டு ரெயில் வந்த தண்டவாளத்தின் நடுவில் தரையோடு தரையாக அப்படியே படுத்து விட்டார். இதைப்பார்த்த ரெயில் ஓட்டுனர், உடனடியாக ரெயிலை நிறுத்த முயன்றார். ஆனால் அதற்குள் ரெயிலின் 3 பெட்டிகள் சகானாதேவியை கடந்து சென்று நின்றது.

காலில் காயத்துடன் உயிர் தப்பினார்

உடனே பயணிகள் ஓடிச்சென்று சகானாதேவியை பார்த்தனர். அதிர்ஷ்டவசமாக காலில் ஏற்பட்ட லேசான காயத்துடன் சகானாதேவி உயிர் தப்பியதை அறிந்ததும் அவர்கள் மகிழ்ச்சி அடைந்தனர். இதுபற்றி தகவல் அறிந்ததும் பெரம்பூர் ரெயில்வே போலீசார் சம்பவ இடத்துக்கு விரைந்து சென்று விசாரணை நடத்தினார்கள்

பின்னர் அவரை சிகிச்சைக்காக அரசு ஸ்டான்லி ஆஸ்பத்திரிக்கு அனுப்பி வைத்தனர். அங்கிருந்து சகானாதேவி மேல் சிகிச்சைக்காக ஜமாலியா பகுதியில் உள்ள தனியார் ஆஸ்பத்திரிக்கு அனுப்பி வைக்கப்பட்டு, தீவிர சிகிச்சை பெற்று வருகிறார். இந்த சம்பவத்தால் பெரம்பூர் ரெயில் நிலையத்தில் நேற்று காலை பரபரப்பு ஏற்பட்டது.

நன்றி: முகநூல்.