மணமேடையான "ஹெலிபேட்'

துபையின் புகழ்பெற்ற புர்ஜ் அல் அரப் ஹோட்டலின் ஹெலிபேடில் (ஹெலிகாப்டர் இறங்கு தளம்) திருமண விழாக்கள் நடத்த அந்த ஹோட்டல் அனுமதி வழங்கியுள்ளது.

இந்த ஹோட்டல் உலகிலேயே அதிக அளவில் புகைப்படம் எடுக்கப்பட்ட கட்டடமாகும். 60 மாடிகளைக் கொண்ட இந்த ஹோட்டலின் ஹெலிபேடானது கடல் மட்டத்திலிருந்து சுமார் 212 மீட்டர் உயரத்தில் அமைந்துள்ளது.

இங்கு நடைபெறும் ஒவ்வொரு திருமணமும் வித்தியாசமான முறையில் நடைபெறும் விதமாக பிரத்யேக திருமண நிர்வகிப்பாளர்கள் உள்ளனர். தேவைகளைப் பொருத்து திருமணத்துக்கான கட்டணம் ரூ.35 லட்சத்தில் தொடங்குகிறது.

மேலும் மணமக்களை "அகஸ்டா 109' என்ற ஹெலிகாப்டர் மூலம் ஆகாய மார்க்கமாகவோ அல்லது "ரோல்ஸ்ராய்ஸ்' காரின் மூலம் சாலை வழியாகவோ அழைத்துச் செல்வதற்கான கட்டணமும் திருமணத்திற்கான கட்டணத்துடன் சேர்த்து வசூலிக்கப்படுகிறது. அத்துடன் விதவிதமான திருமண விருந்து ஏற்பாடுகளும் செய்யப்படுகின்றன.

நன்றி: தினமணி