குறையும் வீட்டுக் கடன் வட்டி

புதிய அரசு பதவிப் பொறுப்பை ஏற்ற பின்னர் அனைத்துத் துறைகளும் எழுச்சி பெறும் என்ற எதிர்பார்ப்பு நாடு முழுவதும் பரவலாக நிலவுகிறது. இதற்கு ரியல் எஸ்டேட் துறையும் விதிவிலக்கல்ல. அனைவருக்கும் வீடு கிடைக்கத் தேவையான நடவடிக்கைகளைப் புதிய அரசு முடுக்கிவிடும் என்ற எதிர்பார்ப்பும் அதிகரித்திருக்கிறது.

இதற்கு வழிகோலுவதுபோல, வீட்டுக் கடன் வட்டியைக் குறைப்பது பற்றித் தீவிரமாகப் பரிசீலிக்கப்படும் என மத்திய அமைச்சர் வெங்கையா நாயுடு சமீபத்தில் அறிவித்தார்.

இதன் காரணமாக வீட்டுக் கடன் வட்டி குறைய வாய்ப்புள்ளது ரியல் எஸ்டேட் துறைக்குச் சாதகமான பலனை ஏற்படுத்தும் என்றே முதலீட்டு ஆலோசகர்கள் கூறுகின்றனர். ஆனால், வீட்டுக் கடன் வசதி குறைக்கப்படும் பட்சத்தில், முதலீட்டாளர்கள் உணர்ச்சி வசப்பட்டோ அல்லது உந்துதல் காரணமாகவோ தவறான முதலீடுகளைத் தேர்வு செய்துவிடக் கூடாது. இங்குத் தவறான முதலீடு என்பது தங்களின் பொருளாதார சக்திக்கு மீறிய முதலீடு என்று முதலீட்டு ஆலோசகர்கள் குறிப்பிடுகின்றனர்.

தொலைக்காட்சிகளிலும், நாளேடுகளிலும் வெகு சமீபத்தில், “வீட்டுக் கடன் வட்டி குறைக்கப்பட்டது” என்ற செய்தி வெளியாகும் என ரியல் எஸ்டேட் துறையினரும், புதிதாக வீடு வாங்கத் திட்டமிட்டுள்ளவர்களும் ஆவலுடன் எதிர்பார்த்துள்ளனர். இந்தச் செய்தி, இரு தரப்பினருக்கும் சாதகமானதுதான் என்றாலும், முதலீட்டாளர்களைப் பொறுத்தவரை, இது மனதளவில் பெரிய தாக்கத்தை ஏற்படுத்தும்.

இதற்குக் காரணம் இல்லாமல் இல்லை. உதாரணமாக 25 லட்சத்தில் வீட்டை வாங்கத் திட்டமிட்டிருந்த ஒருவர், வீட்டுக் கடன் வட்டி குறைக்கப்பட்ட செய்தியைக் கேட்டவுடன், புதிய வீட்டிற்கான முதலீட்டுத் தொகையை 27 முதல் 28 லட்சம் வரை உயர்த்திக்கொள்வார். வட்டி குறைந்துள்ளதால், நம்மால் அதிக அளவு தொகையைத் திரும்பச் செலுத்திவிட முடியும் என்ற நம்பிக்கைதான் இதற்குக் காரணம்.

வாழ்க்கையில் நம்பிக்கை இருக்க வேண்டும் என்பதில் மாற்றுக் கருத்தில்லை என்றாலும், நீண்ட கால முதலீடாகக் கருதப்படும் வீடு வாங்கும் விஷயத்துடன் தொடர்புடைய நிதி விவகாரத்தில், முதலீட்டாளர்கள் அதீத நம்பிக்கையுடன் செயல்படுவது கூடுதல் சிக்கலை ஏற்படுத்திவிடும். வீட்டு வட்டிக் கடன் குறைக்கப்பட்டாலும், தங்களின் நிதி வசதிக்கு ஏற்ப, திரும்பச் செலுத்தும் சக்திக்கு உட்பட்டு, சிறிய அல்லது நடுத்தர வீடுகளை வாங்குவதே சிறந்த முதலீடாக இருக்கும் என்றும் முதலீட்டு ஆலோசகர்கள் கூறுகின்றனர்.

ஏனென்றால், ஒரு படுக்கை அறை கொண்ட ஃப்ளாட் போதும் என்ற பட்சத்தில், அந்தக் குடும்பத்தினர் 2 படுக்கையறை கொண்ட வீட்டை வாங்கினால், அது அதிகபட்ச முதலீடாகவே கருதப்படும். தேவைப்படும் இடவசதியுடன் உள்ள சிறிய வீட்டில், அதன் ஒவ்வொரு சதுரஅடியும், அதிகபட்ச அளவில் பயன்பாட்டில் இருக்கும். அதே நேரத்தில், தேவைக்கு அதிகமான இடவசதி உள்ள வீட்டில், பயன்பாடு இல்லாத இடமும் இருக்கும் நிலை உருவாகும். எனவே, வீட்டுக் கடன் வட்டி குறைகிறதே என்று நினைத்து, வசதிக்கும், தேவைக்கும் அதிகமான பெரிய வீட்டைத் தேர்வு செய்வதற்குப் பதிலாக, அளவில் சிறிய அதே நேரத்தில் வசதிகளுடன் கூடிய வீட்டைத் தேர்வு செய்வதே புத்திசாலித்தனமான முடிவாக இருக்கும்.

இது ஒருபுறம் என்றால், இனி வரும் காலங்களில் ஒருவர் தனது வாழ்நாளில் ஒன்று அல்லது இரண்டு வீடுகளைத்தான் வாங்க முடியும் என்ற பொருளாதார, சமூக நிலை வெகுவாக மாறிவிடும் என்று நம்பிக்கையும் பரவலாகக் காணப்படுகிறது. இன்றைய அவசர உலகில் பல்வேறு காரணங்களுக்காக அதாவது பணியிட மாற்றம், குழந்தைகளின் கல்வி, வசதி வாய்ப்புகள் அதிகரிப்பு போன்றவற்றால், ஒரு தனிப்பட்ட நபர் தனது வாழ்நாளில் இரண்டுக்கும் மேற்பட்ட வீடுகளைச் சொந்தமாக்க நினைப்பதும் இயல்பாகிவிடும் காலம் தற்போது உருவாகியுள்ளது.

எனவே, 5 ஆண்டுகள் முதல் 10 ஆண்டுக்கும் மேற்பட்ட வீடுகளின் விற்பனையும் அதிகரிக்கும் சூழல் காணப்படுகிறது. அதுபோன்ற தருணத்தில், அளவில் சிறிதாக இருக்கும் வீடுகள், முதலீட்டாளர்களின் கவனத்தை வெகுவாக ஈர்க்கும் என்பதால் எளிதில் மறுவிற்பனையாகி விடும். அந்தச் சமயத்திலும், அளவில் பெரிய வீடுகள் அதாவது 2 படுக்கையறை அல்லது 3 படுக்கையறை கொண்ட வீடுகளை விட, வசதி நிறைந்த ஒரு படுக்கையறை கொண்ட வீடு முதலீட்டாளர்களுக்குக் கை கொடுக்கும்.

எனவே, வீட்டின் அளவைத் தேர்வு செய்யும்போது, வங்கிக் கடனைத் திரும்பச் செலுத்தும் திறன், அவசர கால நிதித் தேவைகளுக்கான கையிருப்பு, எதிர்காலத் தேவைகள் அதாவது குழந்தைகளின் படிப்பு மற்றும் மருத்துவத் தேவைகள் ஆகியவற்றைக் கருத்தில் கொண்டு முடிவெடுக்க வேண்டும் என முதலீட்டு ஆலோசகர்கள் அறிவுறுத்துகின்றனர்.

குறிப்பாக, வீட்டுக் கடன் வட்டி குறைப்பு, சலுகை விலையில் கிடைக்கும் வீடுகள் போன்ற கவர்ச்சிகரமான யுக்திகளைக் கவனத்தில் கொள்ளாமல், தனது நிதி ஆதாரத்திற்கு உட்பட்ட விலையில் மற்றும் அளவில் வீட்டை வாங்குவதே சிறந்த முதலீடாக இருக்கும்.


நன்றி: தி இந்து

பயனுள்ள தகவலுக்கு நன்றி

குறிப்பாக, வீட்டுக் கடன் வட்டி குறைப்பு, சலுகை விலையில் கிடைக்கும் வீடுகள் போன்ற கவர்ச்சிகரமான யுக்திகளைக் கவனத்தில் கொள்ளாமல், தனது நிதி ஆதாரத்திற்கு உட்பட்ட விலையில் மற்றும் அளவில் வீட்டை வாங்குவதே சிறந்த முதலீடாக இருக்கும்.

     

பயனுள்ள தகவல்கள்