ஒத்தையடிப்பாதை!

by kanmani singh Tue Apr 07, 2015 5:17 pm

ஒத்தையடிபாதையாய் இருக்கையில்
நான் நடந்த பாதை இது!
செருப்பில்லாத காலோட
செம்மண் புழுதி பறக்க
ஓடி ஆடி வெளையாடுன பாதை இது!
அரசாங்கத்தின் ஆரம்ப சுகாதார நிலையம்
ஊருக்குள் வருகுதுன்னு
அதிகாரிகளின் வண்டிகள் வரவேண்டி
ஒத்தையடிப்பாதைய மண் சாலையா ஆக்குனாக..
ஊருக்குள் ஒரு சில
மச்சி வீட்டுக்காரங்க காரு வண்டி வாங்கினதும்
மண்ணு ரோட்டுக்கு தார் சேலை கட்டினாங்க...
ஒத்தை வண்டி போற அளவுக்கு அகலமிருந்தாலும்
நடந்து போக நல்லாத்தான் இருந்திச்சு..
பள்ளிப்பருவம் முடிந்து
கல்லூரிக்காலத்தின் தொடக்கத்தில்
பேருந்துக்காக வேண்டி ஊர் முக்கு வரைக்கும்
அதுலதான் நடந்து போனேன்...
எம்புட்டு காலந்தான்
இம்புட்டு தூரம் நடக்கனும்னு
ஊர்க்காரவுக மனு போட்டு
டவுன் பேருந்தை ஊருக்குள்ள வர வெச்சாக..
சாலையோரத்தில நின்ன
மரங்களை எல்லாம் மண்ணுக்கு பலி கொடுத்து
தார் சாலைய இன்னும் அகலமாக்கி
விசாலமாக்குனாங்க...
கொஞ்சம் கொஞ்சமா விரிவான சாலை
இப்போ நாலு வழிச் சாலையா ஆகிரிச்சி...
வெட்ட வெறிக்க விரிஞ்சு பரந்த ரோட்டில
காரு வண்டிக சும்மா காத்தா பறக்கையில
பாக்குறதுக்கு பெருமையாத்தான் இருக்கு!
ஆனாலும் என்னமோ
எம்மனசு நடக்குறது எப்பவும்
அந்த ஒத்தையடிப் பாதையில்தான்...
காலில ஒட்டின மண் புழுதிபோல
ஒட்டிகிடக்குது அந்த ஒத்தையடிப்பாதை
மனசுக்குள்ள!