முதலீட்டில் பெண்கள் கவனிக்கவேண்டியவை!

முதலீடு தொடர்பான விஷயங்களை, கணவர் பார்த்துக் கொள்வார் என, பெண்கள் அலட்சி யமாக இருக்க கூடாது என்கிறார், நிதி ஆலோசகர், ஸ்ரீதேவி: சேமிப்பில், நம் பெண்கள் எப்போதுமே ராணிகளாக இருக்கின்றனர். தனியாக எந்த திட்டமிடலும் இல்லாமலே, குறிப்பிட்ட அளவு பணத்தை பெண்கள் சேமிப்பதை, வீடுகளில் பார்க்கலாம். ஆனால், முதலீடு என, வரும் போது மட்டும், நம் பெண்கள் இரண்டு அடி தள்ளி நிற்பது ஏன் என, புரியவில்லை.முதலீடு என்பது ஆண்கள் சம்பந்தப்பட்ட விஷயம் என, தவறாக நினைக்கின்றனர். ஆனால், முதலீடு பற்றிய விஷயங்களை பெண்கள் அறிந்திருப்பதுடன், தங்கள் குடும்பத்தின் நிதி தொடர்பான விஷயங்களை தெரிந்து கொள்வதும் அவசியம். அதாவது, குடும்பத்தின் வருமானம், செலவு, மீதமுள்ள தொகையில் எவ்வளவு சேமிக்கப்படுகிறது, இதனால் கிடைக்கும் ஆண்டு வருமானம் எவ்வளவு போன்ற விவரங்களை, தெரிந்து வைத்திருக்க வேண்டும்.ஏனெனில், பெரும்பாலான ஆண்கள், ஏதாவது சூழ்நிலையில் முதலீட்டை துவங்கி, பின் அதை அப்படியே மறந்திருப்பர். இதனால், முதலீடு செய்த பணம், நஷ்டம் அல்லது அந்த முதலீடு என்ன ஆனது என, கவனிக்காமல் அப்படியே இருப்பதால், அவசரத்திற்கு பயன்படாமல் போகும். எனவே, நிதி தொடர்பான விஷயங்கள் அனைத்தையுமே கணவர் பார்த்துக் கொள்வார் என, பெண்கள் அலட்சியமாக இருக்க கூடாது.'இன்சூரன்ஸ் பிரிமீயம்' செலுத்தும் தேதி போன்ற முதலீட்டு திட்டங்களின் தேதியை முன்னரே அறிந்து, அதற்கு ஏற்ற தேதிக்குள் பணம் கட்ட திட்டமிடலாம். மேலும், முதலீட்டில் எவ்வளவு லாபம் கிடைத்துள்ளது என்பதை கவனித்து, கணவருக்கு தொடர்ந்து தெரியப்படுத்தினாலே, முதலீடு குறித்த தகவல்களை, உங்கள் கணவர் உங்களிடம் பகிர்ந்து கொள்வார்.முதலீட்டில் மிக முக்கி யமானது, ஆவணம். ஆவணம் இல்லை என்றால், முதலீட்டை திரும்ப பெறுவதில் சிக்கல் உருவாகும். எனவே, முதலீடு தொடர்பான அனைத்து ஆவணங்களையும் தெரிந்து பத்திரமாக வைத்திருப்பதுடன், நகல் எடுத்து வைக்கலாம். நிஜ ஆவணம் தொலைந்து விட்டால், நகல் மூலம் முதலீட்டை திரும்ப பெறலாம்.நீங்களோ அல்லது உங்கள் கணவரோ செய்யும், எல்லா வகையான முதலீட்டிலும், உங்களுக்குப் பின் யாருக்கு சொந்தம் சேர வேண்டும் என்பவரான, 'நாமினி'யின் பெயரை குறிப்பிடுவது முக்கியம். திருமணத்திற்கு முன், பெற்றோர் அல்லது உடன் பிறந்தவர்களின் பெயர்களை, நாமினியாக குறிப்பிட்டு இருக்கலாம். திருமணம் ஆன பின், இவற்றை கட்டாயம் மாற்ற வேண்டும். ஏனெனில், அசம்பாவிதங்கள் ஏதாவது நிகழும் போது, முதலீட்டை திரும்ப பெறுவதில் சிக்கல் உருவாவதை, இதன் மூலம் தடுக்க முடியும்.


நன்றி: தினமலர்

நல்லதொரு ஆலோசனை

நல்ல பயனுள்ள குடும்ப ஆலோசனை 



பெண்கள் தெரிந்து கொள்ள வேண்டிய அவசியமான ஒன்று

விழிப்புணர்வு தரும் தகவல் பகிர்வுக்கு நன்றி அண்ணா

பதிவுக்கு நன்றி!