உன்னிடமிருக்கும் இறகுப்பந்து நான்...

தூரத்தில் கேட்கிற
புகைவண்டி ஒலி..
அருகில் தெரியும்
கோயில் கோபுரம்..
இவையெதுவும்
உன்னை நினைவு படுத்தாத
காலைப் பொழுதொன்று
இன்னும் விடியவேயில்லை
எனக்கு!
-
விண்மீன்களை விட்டு விட்டு
நிலாவைப் பார்க்கிறேன் நான்
நிலாவை விட்டுவிட்டு
விண்மீன்களைப் பார்க்கிறாய் நீ..
உன்னையே நீ
பார்த்துக் கொள்வது
உனக்குப் பிடிக்காதுதானே?
-
சிகரத்தின் மீதுள்ள
சிம்மாசனத்தில் அமர்ந்த
கர்வத்தில் மீண்டுமொரு முறை
பூத்து விடுகின்றன
உன் கூந்தலேறிய பூக்கள்
-
உன்னை செதுக்கப்
பயன்பட்ட உளி நான்,
சமயங்களில் கோபிக்கிறபோது
என்னை விடவும்
கூர்மையாக இருக்கிறாய்..!
-
நீ உன் வீட்டில்
நான் என் அறையில்
நாம் நனைய
நினைத்த மழையில்
நனைந்து
கொண்டிருக்கிறது
இந்த இரவு
-
உன்னிடமிருக்கும்
இறகுப்பந்து நான்...
எவ்வளவு முறை
தூக்கியெறிந்தாலும்
உன்னைச் சுற்றியே
வந்து விழுவேன்
ஒடிந்த இறகைக்
கையிலேந்தியபடி!
-
============================

>சிவபராதி
நன்றி: குங்குமம் 15-10-12