த்ரீ இன் ஒன் தையல் மிஷின் அரசு பள்ளி மாணவி அசத்தல்

by mohaideen Wed Sep 24, 2014 6:17 pm

வலங்கைமான்: த்ரீ இன் ஒன் தையல் மிஷினை உருவாக்கி அசத்தி இருக்கிறார் திருவாரூர் மாவட்ட அரசு பள்ளி மாணவி.திருவாரூர் மாவட்டம் வலங்கைமான் அடுத்த இனாம்கிளியூர் கீழத்தெருவை சேர்ந்த கல்யாணசுந்தரம் மகள் இளைய பாரதி. அங்குள்ள ஊராட்சி ஒன்றிய நடுநிலைப் பள்ளியில் 7ம் வகுப்பு படிக்கிறார். திருச்சியில் நடந்த அறிவியல் புத்தாக்க ஆய்வு நிகழ்ச்சியில், தான் தயாரித்த த்ரீ இன் ஒன் தையல் இயந்திர கருவியை அறிமுகம் செய்தார். இந்த த்ரீ இன் ஒன் தையல் இயந்திரம் மூலம் துணியை தைக்கும் நேரத்திலேயே, தண்ணீரை வீட்டு உபயோகத்துக்காக இறைக்கும் வகையிலும், மின்சாரத்தை உற்பத்தி செய்து மின் கலத்தில் சேமிக்கும் வகையிலும் இவர் உருவாக்கியுள்ளார்.

இதை இயக்க மின்சாரம், எரிபொருள் தேவையில்லை. நீர் இறைக்கும் மற்றும் மின் உற்பத்தி செய்யும் கருவிகளைத் தையல் இயந்திரத்துடன் இணைத்துள்ளார். சுற்றுச்சூழலுக்கு எந்த பாதிப்பும் இல்லாத வகையில் உள்ள இவரது கண்டுபிடிப்புக்கு மாநில அளவில் முதல் பரிசு கிடைத்தது. தன் படைப்புக்காக தங்கப் பதக்கம் பெற்றுள்ள இளைய பாரதி, வரும் அக்டோபரில் டெல்லியில் தேசிய அளவில் நடைபெற உள்ள போட்டியில் கலந்து கொள்கிறார். இவரது கண்டுபிடிப்புக்கு ஆசிரியர் செழியன் உறுதுணையாக இருந்துள்ளார். த்ரீ இன் ஒன் தையல் மிஷின் தயாரித்து சாதித்துள்ள மாணவி இளைய பாரதிக்கு பள்ளி தலைமையாசிரியர் மோகன் மற்றும் ஆசிரியர்கள் பாராட்டு தெரிவித்துள்ளனர்.

http://www.dinakaran.com/News_Detail.asp?Nid=110854