மங்கள்யான் வெற்றியை கேலி செய்து கார்ட்டூன் : மன்னிப்பு கேட்டது அமெரிக்க பத்திரிகை

[You must be registered and logged in to see this image.]

வாஷிங்டன்: இந்தியாவின் மங்கள்யான் வெற்றியை கேலி செய்து கார்ட்டூன் வெளியிட்ட அமெரிக்க பத்திரிகை இந்திய வாசகர்களின் எதிர்ப்பை தொடர்ந்து மன்னிப்பு கோரியது. செவ்வாய் கிரகத்துக்கு இந்தியாவின் விண்வெளி ஆராய்ச்சி மையம் கடந்த ஆண்டு மங்கள்யான் என்ற விண்கலத்தை அனுப்பியது. இந்த விண்கலம் கடந்த மாதம் வெற்றிகரமாக செவ்வாய் கிரகத்தின் சுற்றுவட்ட பாதையை அடைந்து புகைப்படம் எடுத்து அனுப்ப தொடங்கியது. இதற்காக இந்தியா ரூ. 450 கோடி மட்டுமே செலவழித்தது. செவ்வாய் கிரகத்துக்கு ஏற்கனவே அமெரிக்கா, ரஷ்யா, ஐரோப்பா ஆகிய நாடுகள் மட்டுமே விண்கலம் அனுப்பியுள்ளன. அதுவும் முதல் முறை அந்தநாடுகள் அனுப்பிய விண்கலம் தோல்வியை தழுவியது. அடுத்தடுத்து முயற்சிகளில் தான் அவைகள் வெற்றி கண்டன. ஆனால் இந்தியா தனது முதல் முயற்சியிலேயே வெற்றி கண்டு உலக விண்வெளி அரங்கில் புதிய சாதனை படைத்தது.

இந்தியாவின் வெற்றி பல நாடுகளுக்கு பொறாமையை ஏற்படுத்தினாலும் அதனை வெளியே காட்டாமல் பாராட்டுகளை தெரிவித்துக் கொண்டன. இந்தியாவின் நட்பு நாடாக கருதப்படும் அமெரிக்காவிலிருந்து வெளிவரும் நியூயார்க் டைம்ஸ் பத்திரிகை இந்தியாவின் வெற்றியை கேலி செய்து கார்ட்டூன் வெளியிட்டது. இந்த பத்திரிகையில் வெளியான கேலி சித்திரத்தில் உயர்ந்த மனிதர்கள் இருவர் எலைட் ஸ்பேஸ் கிளப் அறையில் உட்கார்ந்து கொண்டு மங்கள்யான் வெற்றி குறித்த செய்திகளை படித்துக் கொண்டிருப்பது போலவும், வெளியில் இந்திய ஏழை விவசாயி ஒருவர் மாடு ஒன்றை பிடித்துக் கொண்டு கிளப் கதவை தட்டுவது போலவும் வரையப்பட்டிருந்தது.

இதற்கு அமெரிக்கா மற்றும் இந்தியாவில் உள்ள வாசகர்களிடமிருந்து கடும் எதிர்ப்பு கிளம்பியது. இதை தொடர்ந்து தனது கேலி  சித்திரத்துக்காக அமெரிக்க பத்திரிகை ஆசிரியர் ஆன்ட்ரு ரோசன்தால் மன்னிப்பு கேட்டுள்ளார். இது தொடர்பாக அவர் தனது பேஸ்புக் பக்கத்தில், இந்தியாவை சிறுமைபடுத்தும் நோக்கத்தில் கேலி சித்திரம் வெளியிடப்படவில்லை எனவும் இந்தியா போன்ற வளர்ந்து வரும் நாடுகள் பணக்கார நாடுகளின் சாதனையை எட்ட முடியும் என்பதை வெளிப்படுத்தும் வகையிலும் தான் அந்த கார்ட்டூன் வரையப்பட்டதாக விளக்கம் அளித்துள்ளார். மேலும் இந்த சித்திரம் யாருடைய மனதையாவது புண்படுத்திஇருந்தால் அதற்காக மன்னிப்பு கேட்டுக்கொள்வதாகவும் ஆன்ட்ரு தெரிவித்துள்ளார்.

நன்றி: தினகரன்