பூமியிலிருந்து 180 ஒளி ஆண்டுகள் தூரத்தில் உள்ள புதிய கிரகம்

by நாஞ்சில் குமார் Fri Dec 19, 2014 8:22 pm

[You must be registered and logged in to see this image.]

வாஷிங்டன்: சூரிய குடும்பத்திற்கு வெளியே உள்ள கிரகங்களைப் பற்றி ஆய்வு மேற்கொண்டு வரும் நாசாவின் கெப்லர் விண்கலம், தனது ஆராய்ச்சியின் மைல் கல்லாக புதிய கிரகம் ஒன்றை கண்டுபிடித்துள்ளதாக வானியலாளர்கள் நேற்று அறிவித்தனர். பூமியிலிருந்து 180 ஒளி ஆண்டுகள் தூரத்தில் உள்ள இந்த கிரகம் 20000 மைல் விட்டம் கொண்டு காணப்படுகிறது. எனவே இது பூமியை விட இரண்டரை மடங்கு பெரிதானது. இது சூரியனை விட அளவில் சிறியது.

கடந்த பிப்ரவரி மாதம் வான் இயற்பியல் ஆய்வு மேற்கொள்ளும் ஆண்ட்ரூ வெண்டர்பர்க் தலைமையில் ஒரு குழு தொலைநோக்கியின் மூலம் நடத்திய ஒன்பது நாள் சோதனை ஓட்டத்தின் போது, ஹெச்.ஐ.பி 116454 என்ற நட்சத்திரத்திற்கு முன் ஒரு கிரகம் கடந்து செல்வதைக் கண்டுபிடித்தனர். தரையிலிருக்கும் தொலைநோக்கிகளின் தொடர் அவதானிப்புகளின் மூலமும், கனடிய மோஸ்ட் செயற்கைக் கோளும் அந்த புதிய கிரகத்தின் இருப்பை உறுதி செய்துள்ளது. நாசாவின் வானியல் ஆய்வில் இது முக்கிய திருப்புமுனை என்று ஆய்வாளர்கள் தெரிவித்துள்ளனர்.

- தினகரன்