ஏதோ ஒன்றாகவே!!

நானும் உன்னைப் போலாகிறேன்
ஒரு இறகுபோல் ...
இமைகளற்ற விழிகள் கொள்கிறேன்
இரவுகளற்ற உறக்கம் காண்கிறேன்!
நரம்புகளில் நஞ்சு சுமந்து
இதயத்தின் கரை சேர்க்கிறேன்
காதலைக் கருணைக்கொலை செய்ய!
மரணத்தின் கூரிய நகங்கள் பிடுங்கி
பிறிதொரு பொழுதில் மரணம் வெல்கிறேன்!
நானும் உன்னைப் போலாகிறேன்
ஒரு மழைத்துளி போல்...
கரிசல் காடுகளில் காணாமல் போகிறேன்
பெருங்கடலில் போய் விழுகிறேன்!
ஒளியற்ற வீதிகளில்
விதைக்கிறேன் விண்மீன்களை
நிலவை பயிராக்க!
வெற்றிடங்களில் அலைகின்றன
என் கவிதைகள்...
வெள்ளைத் தாள்களில் விம்முகின்றன
உன் மறுதலிப்புகள்!
நானும் உன்னைப் போலாகிறேன்
ஒரு சிறு மலர் போல்...
புன்னகை சுமக்கிறேன் சிறு பொழுதுகளில்
காம்பில் மரணிக்கிறேன் மறு பொழுதில்!
காதலின் பெருவலியை நீராக்கி
வேருக்குள் வாழ்கிறேன் சுவடுகள் மறைத்து...
நானும் உன்னைப் போலாகிறேன்
ஏதோ ஒன்றாகவே!!

எல்லாரும் இதுபோலாகி வருந்தி இருந்தவர்கள்தான்...

நற்கவிக்குப் பாராட்டுகள்

நன்றி கவிஞர் அவர்களே!

அருமை அருமை