பிள்ளை நிலாக்கள்!

by kanmani singh Thu Nov 13, 2014 5:20 pm

உனக்கு தம்பி பாப்பா வேணுமா
தங்கச்சி பாப்பா வேணுமா
என்று கேட்கையில்
குழந்தைகள் சொல்லும் பதில்
உள்ளத்துக்குள்ளிருந்து வருவதில்லை...

*****************
பிள்ளை நிலாக்களை சுமக்கும்
பள்ளிப் பேருந்துகளைக் காண்கையில்
மனக்கண் முன் வருகிறது
கடவுளை சுமந்து வரும் தேர்!

*****************
குச்சி மிட்டாயும் குருவி ரொட்டியும் போய்
பீட்சாவும் பர்கரும் வந்த பின்னும்
அழுகை அடங்குவதென்னவோ
அம்மாவின் மடியில்தான்!

*****************
இருசக்கர வாகனத்தில்
அப்பாவின் கரங்களுக்குள்
அமர்ந்து செல்லும் குழந்தைக்கு
அதைவிட பாதுகாப்பான இடமொன்று
பயணத்தில் இருப்பதாக தெரிவதில்லை...
அறியப்படுவதும் இல்லை!