தேர்வுக்கு முன் தேர்ந்தெடுத்து உண்ணுங்கள்!

தேர்வு நேரம்

‘நல்லா சாப்பிட்டாதான் உடம்புலயும் மனசுலயும் தெம்பிருக்கும். படிச்சதெல்லாம் மறக்காம இருக்கும்’ என அம்மாக்கள் பிள்ளைகளுக்கு ஊட்ட...‘சாப்பிட்டா தூக்கம் வருது. ஏற்கனவே எக்ஸாம் பயத்துல வயிறு கலங்குது. இதுல நிறைய சாப்பிட்டா, இன்னும் கஷ்டம்... சாப்பாடே வேண்டாம்...’  என பிள்ளைகள் மறுத்து விலக... தேர்வுகள் நெருங்கும் நேரத்தில் அம்மாக்களுக்கும் பிள்ளைகளுக்கும் நடக்கும் இந்த ஆடுபுலி ஆட்டத்தை அனேக  வீடுகளில் பார்க்கலாம்.

‘பொதுத்தேர்வு எழுதப்போகும் பள்ளி மாணவ, மாணவியர் தங்கள் உணவு விஷயத்தில் மிகுந்த கவனத்துடன் இருக்க வேண்டும்’ என்று  வலியுறுத்துகின்ற டயட்டீஷியன் புவனேஸ்வரி மாணவ, மாணவியருக்கேற்ற உணவு வகைகள் பற்றி ‘சுவை’பட கூறுகிறார்.

“பொதுத்தேர்வு எழுதப்போகும் மாணவ, மாணவியர்கள் தூக்கம் தவிர்த்து படிப்பது நல்லதல்ல. சாப்பிட்ட உணவு செரிக்க நல்ல தூக்கம் தேவை.  மாணவ, மாணவியர் தாங்கள் எழுதப்போகும் பொதுத்தேர்வு காரணமாக, ஏற்கனவே மன அழுத்தத்துக்கு ஆட்பட்டு இருப்பார்கள்.  இரவில் நீண்ட நேரம்  கண்விழித்துப் படித்தல் காரணமாக, சரியான தூக்கம் இன்மையால் அவதிப்படுவார்கள். இதன் காரணமாக உடலில் எதிர்ப்பு சக்தி குறையும். எனவே,  உடல் நலக்குறைவு ஏற்பட வாய்ப்புகள் அதிகம். பத்தாம் மற்றும் பனிரெண்டாம் வகுப்பு தேர்வுக்கு தயாராகி வரும் மாணவ, மாணவியர் படிப்பில்  கவனம் செலுத்துவதற்கு சரிசமமாக உடல்நலத்திலும் அக்கறை கொள்ள வேண்டும். அதனால், அவர்களுக்குத் தீங்கு விளைவிக்காத, ஆரோக்கியம்  நிறைந்த உணவு வகைகள் அவசியம்.  

துரித உணவகங்களில், ஹோட்டல்களில் விற்கப்படும் உணவுப்பண்டங்கள் சுகாதாரமாகவும் ஆரோக்கியம் நிறைந்ததாகவும் இருக்காது. ஆகவே,  வெளியில் சாப்பிடுவதைத் தவிர்க்க வேண்டும். ஒருவேளை வெளியிடங்களில் சாப்பிட வேண்டிய கட்டாயம் ஏற்பட்டால், மசாலா அதிகம்  சேர்க்கப்பட்ட, எண்ணெயில் வறுத்த உணவுப் பண்டங்களைத் தவிர்ப்பதே நல்லது. நேரம் தவறாமல் சாப்பிடுவதை மாணவ, மாணவியர் கண்டிப்பாக  கடைப்பிடிக்க வேண்டும். முக்கியமாக, பழங்கள், காய்கறிகள் ஆகியவற்றை உணவில் அதிக அளவில் சேர்த்துக்கொள்ள வேண்டும். இரவில் நீண்ட  நேரம் கண்விழித்துப் படிப்பதற்காக, டீ அல்லது காபி அடிக்கடி குடிப்பார்கள். அவ்வாறு செய்யக்கூடாது.

இந்தப் பானங்களை கண்விழித்துப் படிக்கும்போது, 2 முறை மட்டும் குடிக்கலாம். மாற்றாக பாதாம் பால், மில்க்ஷேக் குடிப்பது நன்மை தரும். படித்த பாடங்கள் மறக்காமல் மனதில் இருக்க வேண்டுமானால், அளவான சாப்பாடு, அளவான தூக்கம் கண்டிப்பாக தேவை. தேர்வு நேரங்களில் தினம்  ஆறு மணிநேரம் தூக்கம் அவசியம். இல்லாவிட்டால், சோர்வினால் நன்றாக எழுத முடியாமல் போய்விடும். தேர்வுக்கு சாப்பிடாமல் போகக் கூடாது.  வயிறு நிறைய சாப்பிடவும் கூடாது. தேர்வு எழுதிவிட்டு வந்த பிறகு, சத்தான உணவுகளை ஆற அமர சாப்பிடலாம்.  பூரி, வடை போன்ற உணவுப்பண்டங்களுக்குப் பதிலாக, ஆவியில் வேக வைத்த இட்லி, புட்டு, இடியாப்பம் போன்ற உணவு வகைகள் சிறந்தவை.

தினம் 2 டம்ளர் அளவு பால், தயிர், மோர் மற்றும் பழ ரசங்கள் பருகுவது உகந்தது. இவை மாணவ, மாணவியருக்குத் தேவையான ஆற்றலைக்  கொடுக்கும். ஐஸ்க்ரீம், நொறுக்குத்தீனிகள் போன்றவற்றை அறவே தவிர்ப்பது நல்லது.பச்சைக் காய்கறிகள், வெஜிடபிள் சாலட், ஃபுரூட் சாலட்  ஆகியவற்றை உணவில் சேர்க்க வேண்டும். கீரைகள் அவசியம். தேர்வு நேரங்களில் அசைவ உணவு தவிர்ப்பது மிகவும் நல்லது. இவ்வகை  உணவுகளைச் சாப்பிட வேண்டிய நிலை ஏற்பட்டால், அளவான மசாலா, எண்ணெயில் செய்யப்பட்டவையாகவே இருக்க வேண்டும். வேக வைத்த  முட்டை நல்லது. படிப்புக்கு நடுவே 10 நிமிடமாவது விளையாட்டு, நடைப்பயிற்சி, மெல்லிசை கேட்பது போன்றவற்றை செய்யலாம். இவை எல்லாம்  உடலுக்கும் மனதுக்கும்  புத்துணர்வை உண்டாக்கும்.’’

http://www.dinakaran.com/Medical_Detail.asp?cat=500&Nid=3360

நல்லதொரு பகிர்வுக்கு மிக்க நன்றி அண்ணா