முதுகெலும்புகளும் கபாலங்களும்

-
விரால்கள் துள்ளிய கழனிகளும்
தாமரை பூத்த தடாகங்களும்
கனவில் விளைந்தபோது
அது விட்ட பெருமூச்சில்
பூச்சிக் கொல்லிகளின் நெடி கமழ்ந்தது
-
அனைத்திற்கும் இயந்திரங்கள்
வந்திறங்கி விட்டபோது
அவயவங்கள் துருப்பிடித்து
சிதிலங்கள் உதிர்ந்தன
-
ஆழ்துளை தோண்டும் ராட்சத இயந்திரங்கள்
மீத்தேன் திருட பூமியைக் கடைந்தபோது
மொத்த விஷத்தையும் கக்கிற்று
நீலமாகிவிட்ட நிலம்
-
திருநீலகண்டனாய் தெருவுக்கு வந்து
பசியிலும் தாகத்தாலும் துரத்தப்பட்ட
முதுகெலும்பு
ரயிலேறி வந்து திருப்பூரில் இறங்குகையில்
விமானமேறிப் பறந்து கொண்டிருந்தன
தேசத்தின் கபாலங்கள்!
-
செவ்வாய்க்கிரகத்துக்கு விண்கலங்கள் உயர்ந்தபோது
ரயிலேற நின்றது தேசத்தின் முதுகெலும்பு
அது கூன் விழுந்திருந்தது – ஆனாலும்
எவ்வளவு வளைந்தாலும் உடைந்து விடாதிருந்தது
-
மண்புழுக்கள் அழிந்து விட்ட
மலட்டு நிலமெங்கும்
வெடிப்பும் வெக்கையுமே
வெள்ளாமை ஆக
வெறுத்து பாறையுடன் அது
இலக்கற்று நடந்தபோது
வேதாளாமாய்ச் சுமந்திருந்தது
-
——————————
கோ.கலியமூர்த்தி
நன்றி- கல்கி

சிறப்பான பகிர்வுக்கு நன்றி அண்ணா.



#spm3