ஓங்காரம் பண்ணி விடு !

கும்பி கொதித்தென்
குருதி துடிக்குதடி!
குவலயத்தின்  அவலம் தனை
குமுறி மனம் கொட்டுதடி!

ஆவி பதறியென்
ஆதங்கம் பொங்குதடி
ஆகாத பாவமெல்லாம்
ஆகுதியாகுமாடி!?

பெறு மகளை பெண்டாழும்
பேடித்தன உலகமடி
கர்ப்பத்தை பகிர்ந்தவளை
கற்பழிக்கும் கயமையடி !?

வேட்டையாடும் வேலிக்குள்
வெள்ளாட்டுக் கூட்டமடி
வெளியிலிருந்து நரி வந்தா
பலியெடுக்க வேண்டுமடி!?

பெற்ற மகள் என்னையவள்
மாற்றானாய் பார்க்கையிலே
ஆணாய் நான் பிறந்த
தவமானம் தானேடி !?

தீட்டான உறவுகளால்
தீய்ந்து விட்ட மரபுகளால்
தீராத பழி சுமந்து
தீக்குளிக்க வேண்டுமோடி!?

ஆறாத வேதனையில்
தேறாத மனதுடன்
மாறாத வடுக்களால்
தேம்பிமனம்  வேகுதடி!

ஆண்கள் எம்மானம்
வாங்கும் ஈனப்பிறவிகளை
ஓங்கி மிதித்து நீ
ஓங்காரம் பண்ணி விடு !

-தமிழினியன்-

ஆண்கள் எம்மானம்
வாங்கும் ஈனப்பிறவிகளை
ஓங்கி மிதித்து நீ
ஓங்காரம் பண்ணி விடு !

அருமையாய் சொன்னீர் தமிழினியன்

நன்றி நண்பரே!