சூயிங்கம் மென்றால் தப்பா?

by mohaideen Tue Jun 16, 2015 4:38 pm

கல்லூரியில் படிக்கும் என் மகள் எப்போதும் சூயிங்கம் மென்றுகொண்டே இருக்கிறாள். இதனால் ஏதேனும் பாதிப்புகள் வருமா?

ஐயம் தீர்க்கிறார் பல் மருத்துவர் ரேகா ஹரிஹரன்

‘‘சூயிங்கம் மெல்வதால் தவறு ஒன்றுமில்லை. இன்றைய இளைய தலைமுறைக்கு அதில் ஏதோ ஒரு சந்தோஷம் இருக்கிறது. அவர்களின் உரிமையில் நாம் தலையிட வேண்டியதில்லை. உண்மையில் சூயிங்கம்மில் சில நல்ல விஷயங்கள் இருக்கின்றன. நம் செரிமானத்துக்கும் உணவுத்துகள்களை அகற்றவும் உதவும் உமிழ்நீர் சுரப்பை சூயிங்கம் தூண்டுகிறது.

நம் தாடையின் தசைகளுக்குப் பயிற்சியாகவும் முகத்துக்கு ரத்த ஓட்டத்தை அதிகரிக்கவும் உதவுகிறது. தைராய்டு போன்ற ஹார்மோன் குறைபாடு உள்ளவர்களுக்கும் தண்ணீர் குறைவாக அருந்துகிறவர்களுக்கும் வாய்ப் பகுதி வறட்சியாக இருக்கும். அவர்களுக்கு வறட்சியைப் போக்க சூயிங்கம் பயன்படும். இப்போது சொத்தை வராமல் இருப்பதற்கான சூயிங்கம்மை பல் மருத்துவர்களே பரிந்துரைக்கிறார்கள்.

ஆனால், எதுவும் அளவு கடந்தால் ஆபத்து என்பது போல் ஒரு நாளுக்கு ஒன்றிரண்டுக்கு மேல் சூயிங்கம் மென்றுகொண்டே இருப்பவர்களுக்கு TMJ என்கிற டெம்ப்ரோ மேண்டிபுலர் ஜாயின்ட்டில் கண்டிப்பாகப் பிரச்னை ஏற்படும். நம்முடைய மேல் வாயையும் கீழ் தாடையையும் இணைக்கும் இந்த டி.எம்.ஜே. எலும்பு தேய்ந்து நாளடைவில் தாடை வலி ஏற்படுவதுடன் வாயை மூடுவதே சிரமம் ஆகிவிடலாம். சூயிங்கம் பழக்கம் உள்ளவர்களுக்கு பசியின்மை ஏற்படும் வாய்ப்பும் உண்டு.

கிரிக்கெட் வீரர்கள் சூயிங்கம் மெல்வது ஒரு பழக்கமாகவோ அல்லது தனிப்பட்ட முறையில் உற்சாகம் தருவதற்காகவோ வேண்டுமானால் இருக்கலாம். அதற்கு மருத்துவரீதியான காரணங்கள் எதுவும் இல்லை. உடற்பயிற்சி செய்கிறவர்களும் சூயிங்கம் மெல்வதால் உடல் வார்ம் அப் ஆகும் என்றும் நினைப்பதும் தவறான நம்பிக்கைதான். மற்றவர்களிடம் பேசும்போதோ, நிகழ்ச்சிகளின்போதோ சூயிங்கம் மென்றுகொண்டிருப்பது நம்மைப் பற்றித் தவறான அபிப்பிராயங்களை மற்றவர்களிடம் உருவாக்கலாம். அதனால் இதுபோன்ற சூழ்நிலைகளையும், அதிகம் சூயிங்கம் பயன்பாட்டையும் இளைஞர்கள் தவிர்க்க வேண்டும்!’’

http://www.dinakaran.com/Medical_Detail.asp?cat=500&Nid=3629