குழந்தை பேறு கிடைக்க மார்க்கபந்தீஸ்வரர் வழிபாடு

வேலூர் மாவட்டம், விரிஞ்சிபுரம் மரகதாம்பிகை உடனுறை மார்க்கபந்தீஸ்வரர் கோவில் புகழ்பெற்ற சிவதலங்களில் ஒன்று. அடிமுடி காண முடியாமல் பொய் சொல்லி திருஅண்ணாமலையாரிடம் பெற்ற சாபத்தை பிரம்மா, மார்க்கபந்தீஸ்வரரை பூஜித்து சாப விமோசனம் பெற்றது இத்திருத்தலம் ஆகும். கோவிலில் உள்ள சிம்ம தீர்த்தம் மிகவும் விசேஷமானது. இத்தீர்த்த குளம் கார்த்திகை மாதம் கடைசி சனிக்கிழமை வருகிற 12-ந் தேதி நள்ளிரவு 12 மணிக்கு திறக்கப்படும். இந்த தீர்த்த குளத்தில் குளித்தால் குழந்தை பேறு இல்லாத பெண்களுக்கு குழந்தை பேறும், பேய், பிசாசு, பில்லி, சூன்யம், வலிப்பு, தீவினைகள் பிடித்தவர்களுக்கு அகலவும் செய்யும் என்பது தொன்றுதொட்டு வரும் நம்பிக்கை.

முதலில் ஷீரா நதி என்னும் பாலாற்றில் குளித்துவிட்டு, கோவிலின் அருகில் உள்ள பிரம்மனால் உருவாக்கப்பட்ட பிரம்ம தீர்த்தத்தில் நீராடி தொடர்ந்து சிம்ம வாய் முகம் கொண்ட சிம்ம தீர்த்தத்தில் மூழ்கி எழுந்து ஈர உடையுடன் மடியில் பூ, பழம், தேங்காய் வைத்துக் கொண்டு கோவில் பிரகாரத்தில் படுத்து உறங்கினால், அவர்களது கனவில் சிவபெருமான் தோன்றி பழம், புஷ்பம், பாலாடை கொடுத்து குழந்தை வரம் அருளுவார் என்பது நம்பிக்கை. மேலும் கோவிலில் உள்ள சூலி தீர்த்தம், சோம தீர்த்தம் ஆகியவற்றில் நீராடினால் எல்லா வகை துன்பங்களும் அகலும் என்பது நம்பிக்கை.