துரத்தும் தோல்வி… துவண்ட தோனி…குஜராத்துக்கு 6-ஆவது வெற்றி; புணேவுக்கு 5-ஆவது வீழ்ச்சி

ஐபிஎல் கிரிக்கெட் போட்டியின் 25-ஆவது லீக் ஆட்டத்தில்
3 விக்கெட் வித்தியாசத்தில் ரைஸிங் புணே சூப்பர்ஜயன்ட்ஸ்
அணியைத் தோற்கடித்தது குஜராத் லயன்ஸ்.

புணே வீரர் ஸ்டீவன் ஸ்மித் சதமடித்தபோதும், அந்த
அணியால் தோல்வியைத் தவிர்க்க முடியவில்லை.

இதுவரை 7 ஆட்டங்களில் விளையாடியுள்ள குஜராத்
6-ஆவது வெற்றியைப் பெற்றுள்ளது. அதேநேரத்தில்
7 ஆட்டங்களில் விளையாடியுள்ள புணேவுக்கு இது 5-ஆவது
தோல்வியாகும்.

புணேவில் வெள்ளிக்கிழமை நடைபெற்ற இந்த ஆட்டத்தில்
முதலில் பேட் செய்த புணே அணியில் ரஹானே பவுண்டரி
அடித்து ரன் கணக்கைத் தொடங்க, செüரப் திவாரி 1 ரன்னில்
ரன் அவுட்டானார்.

இதையடுத்து ரஹானேவுடன் ஜோடி சேர்ந்தார்
ஸ்டீவன் ஸ்மித். ரஹானே நிதானமாக ரன் சேர்க்க,
ஸ்மித் பவுண்டரிகளை விளாசித் தள்ளினார். இதனால்
10 ஓவர்களில் 85 ரன்களை எட்டியது புணே.

கெüஷிக் வீசிய நோ-பால் காரணமாக (போல்டு) வாழ்வு
பெற்ற ஸ்மித், 29 பந்துகளில் அரை சதம் கண்டார்.

இதன்பிறகு 43 பந்துகளில் அரை சதம் கண்ட ரஹானே,
45 பந்துகளில் 53 ரன்கள் எடுத்து ஆட்டமிழந்தார்.
ரஹானே-ஸ்மித் ஜோடி 2-ஆவது விக்கெட்டுக்கு 111 ரன்கள்
சேர்த்தது.

-
இதையடுத்து கேப்டன் தோனி களமிறங்க, தொடர்ந்து வேகம்
காட்டிய ஸ்மித், பிராவோ வீசிய கடைசி ஓவரில் பவுண்டரி
அடித்து 53 பந்துகளில் சதமடித்தார். இந்த ஐபிஎல் தொடரில்
அடிக்கப்பட்ட 3-ஆவது சதம் இது.

ஆனால் அடுத்த பந்திலேயே போல்டானார் ஸ்மித். அவர்
54 பந்துகளில் 101 ரன்கள் குவித்தார். இறுதியில் 20 ஓவர்களில்
3 விக்கெட் இழப்புக்கு 195 ரன்கள் குவித்தது புணே. தோனி
18 பந்துகளில் 2 சிக்ஸர், 2 பவுண்டரிகளுடன் 30, பெரேரா
3 ரன்களுடன் ஆட்டமிழக்காமல் இருந்தனர்.

அதிரடி தொடக்கம்: பின்னர் ஆடிய குஜராத் அணியில் டுவைன்
ஸ்மித்-மெக்கல்லம் ஜோடி முதல் விக்கெட்டுக்கு 8.1 ஓவர்களில்
93 ரன்கள் சேர்த்து அதிரடி தொடக்கம் ஏற்படுத்தியது.
மெக்கல்லம் 22 பந்துகளில் 2 சிக்ஸர், 5 பவுண்டரிகளுடன்
43 ரன்கள் சேர்த்து ஆட்டமிழந்தார்.

இதையடுத்து ரெய்னா களமிறங்க, 28 பந்துகளில் அரை
சதமடித்த ஸ்மித், 37 பந்துகளில் 1 சிக்ஸர், 9 பவுண்டரிகளுடன்
63 ரன்கள் குவித்து ஆட்டமிழந்தார்.

இதையடுத்து வந்த தினேஷ் கார்த்திக் 33 (20), பின்னர் வந்த
பிராவோ 7 ரன்களில் வெளியேற, ஜடேஜா டக் அவுட்டானார்.
கடைசி ஓவரில் 9 ரன்கள் எடுத்தால் வெற்றி என்ற நிலை
ஏற்பட்டது. பெரேரா வீசிய அந்த ஓவரின் முதல் பந்தில்
ஃபாக்னர் பவுண்டரி அடிக்க, 3-ஆவது பந்தில் ரெய்னா
ஆட்டமிழந்தார்.

அவர் 28 பந்துகளில் 34 ரன்கள் எடுத்தார். அடுத்து வந்த இஷான்
கிஷன் டக் அவுட்டாக, 2 பந்துகளில் 3 ரன்கள் தேவைப்பட்டன.
5-ஆவது பந்தில் 2 ரன் எடுத்த ஃபாக்னர், அடுத்த பந்தில் ஒரு ரன்
எடுக்க, 20 ஓவர்களில் 7 விக்கெட் இழப்புக்கு 196 ரன்கள் எடுத்து
வெற்றி கண்டது குஜராத். சதமடித்த ஸ்மித் ஆட்டநாயகனாகத்
தேர்வு செய்யப்பட்டார்.
–
——————————-
சுருக்கமான ஸ்கோர்
புணே-195/3
ஸ்டீவன் ஸ்மித் 101 (54)
ரஹானே 53 (45)
பிராவோ 1வி/40
குஜராத்-196/7
டுவைன் ஸ்மித் 63 (37)
மெக்கல்லம் 43 (22)
அசோக் திண்டா 2வி/40
புணே அணியில் கவாஜா
புணே அணியின் முன்னணி பேட்ஸ்மேன்களான
கெவின் பீட்டர்சன், டூபிளெஸ்ஸிஸ் ஆகியோர் காயம்
காரணமாக ஐபிஎல் தொடரிலிருந்து விலகிவிட்டனர்.

இதையடுத்து ஆஸ்திரேலிய வீரர் உஸ்மான் கவாஜாவுடன்
அந்த அணி ஒப்பந்தம் செய்துள்ளது.
–
–
தினமணி

-

இந்த தோல்விக்கு பிறகு புனே கேப்டன் டோனி
கூறுகையில்,
‘பந்து வீச்சு எங்களுக்கு ‘கிளிக்’ ஆகவில்லை என்று
நினைக்கிறேன். முதல் 6 ஓவர்களில் 60 ரன்களுக்கு மேல்
விட்டுக்கொடுத்ததால் மிகுந்த நெருக்கடி ஏற்பட்டது.

தொடக்ககட்ட பந்து வீச்சில் நிச்சயம் முன்னேற்றம்
தேவையாகும். காயத்தால் சில பேட்ஸ்மேன்களை
இழந்துள்ளோம். காயம் விஷயத்தில் நம்மால் எதுவும்
செய்ய முடியாது.

ஆனாலும் இன்னும் பேட்டிங்கை விட பந்து வீச்சில் தான்
தொடர்ந்து தடுமாறிக்கொண்டிருக்கிறோம். 5 பவுலர்கள்,
6 பவுலர்களுடன் ஆடிப்பார்த்து விட்டோம்.

ஆனால் எதுவும் கைகொடுக்கவில்லை. சில குறைபாடுகளை
அடுத்த ஆட்டத்துக்கு முன்பு சரி செய்ய வேண்டியது அவசியம்.
இல்லாவிட்டால் தொடர்ந்து தோல்வியைத் தான் சந்திக்க
நேரிடும்’ என்றார்.

குஜராத் கேப்டன் ரெய்னா கூறுகையில், ‘மெக்கல்லமும்,
வெய்ன் சுமித்தும் முதல் 6 ஓவர்களில் (72 ரன்) எதிரணியின்
பந்து வீச்சை நொறுக்கி எடுத்து விட்டனர். இது போன்ற
இலக்கை துரத்தும் போது ‘பவர்–பிளே’யான முதல்
6 ஓவர்களில் அதிரடியாக ஆட வேண்டியது முக்கியம்.
அது எங்களுக்கு நன்கு கைகொடுத்தது.

டோனியுடன் விளையாடுவது நான் செய்த அதிர்ஷ்டம்.
அவரிடம் இருந்து நான் நிறைய விஷயங்களை கற்றுக்
கொண்டிருக்கிறேன். துரதிர்ஷ்டவசமாக அவரது அணி இன்று
வெற்றி பெறவில்லை. அவர் மிகுந்த அதிர்ச்சியில் இருப்பார்.
அதனால் அவரை பிறகு சந்திப்பேன்’ என்றார்.
–