பெங்களூருவை வீழ்த்தியது மும்பை: கோலியின் தோல்வி தொடர்கிறது

-
பெங்களூரு:
ஐபிஎல் தொடரில் இன்று நடைபெற்ற ஆட்டத்தில்
மும்பை இண்டியன்ஸ் அணி 6 விக்கெட்டுகள்
வித்தியாசத்தில் ராயல் சேலஞ்சர்ஸ் பெங்களூரு
அணியை வீழ்த்தியது.

பெங்களூருவில் நடைபெற்ற இந்த ஆட்டத்தில் டாஸ்
வென்ற மும்பை அணி கேப்டன் ரோஹித் சர்மா
பீல்டிங்கை தேர்வு செய்தார்.

பெங்களூரூ அணியின் தொடக்க ஆட்டக்காரர்களாக
விராட் கோலியும், கிறிஸ் கெயிலும் களமிறங்கினர்.
கோலி 7 ரன்களில் அவுட் ஆகி அதிர்ச்சி அளித்தார்.
சரியாக விளையாடாத நிலையில், மீண்டும் வாய்ப்பு
பெற்ற கெயில் இன்றும் சோபிக்கவில்லை.
அவர் 5 ரன்களில் பெவிலியன் திரும்பினார்.

இதையடுத்து டி.வில்லியர்ஸும், கே.எல்.ராகுலும்
இணைந்து ரன் எண்ணிக்கையை உயர்த்தினர். அதில்
டி.வில்லியர்ஸ் 24 ரன்களில் ஆட்டமிழந்தார். அடுத்த
வந்த வாட்சனை துல்லியமான ‘த்ரோ’ மூலம் ரன் அவுட்
ஆக்கினார் ரோகித் சர்மா.

-


ஒரு முனையில் விக்கெட்டுகள் வீழ்ந்தாலும்,
கே.எல்.ராகுல் நிலைத்து நின்று, ஆட்டமிழக்காமல்
68 ரன்கள் குவித்தார். இதில் 3 பவுண்டரிகளும்
4 சிக்ஸரும் அடங்கும். இதேபோல மற்றொரு இளம்
வீரர் சச்சின் பேசி 13 பந்துகளில் 25 ரன்கள் குவித்து
கடைசி வரை ஆட்டமிழக்காமல் இருந்தார்.

பெங்களூரு அணி 20 ஓவர்களில் 4 விக்கெட்டுகளை
இழந்து 151 ரன்கள் எடுத்தது.
—

அடுத்து விளையாடிய மும்பை அணிக்கு ஆரம்பமே
அதிர்ச்சியாக இருந்தது. தொடக்க வீரர் பர்தீவ் படேல்
1 ரன்னில் பெவிலியன் திரும்பினார்.

இதையடுத்து ரோஹித் சர்மாவுடன் இணைந்த அம்படி
ராயுடு அதிரடியாக விளையாடினர். இந்த ஜோடி
இரண்டாவது விக்கெட்டுக்கு 58 ரன்கள் குவித்தது.
ரோஹித் சர்மா 25 ரன்களில் வெளியேற, அடுத்து
வந்த ராணா 9 ரன்களில் வெளியேறினார்.

இதனிடையே நன்றாக விளையாடிக் கொண்டிருந்த
ராயுடுவை அபார கேட்ச் மூலம் வெளியேற்றினார்
டி.வில்லியர்ஸ். ராயுடு 47 பந்துகளில் 44 ரன்கள்
குவித்தார்.

கடைசி 4 ஓவர்களில் 44 ரன்கள் எடுக்க வேண்டிய
நிலையில், வாட்சன் வீசிய 17-வது ஓவரில் ஒரு சிக்ஸர்
மற்றும் இரு பவுண்டரிகளை விளாசினார் போல்லார்டு.
அவருக்கு இணையாக விளையாடிய பட்லரும் அதிரடி
காட்ட, மும்பை அணி 18.4 ஓவர்களில் 153 ரன்கள்
எடுத்து வெற்றி பெற்றது.

போல்லார்டு 19 பந்துகளில் 35 ரன்களும், பட்லர்
11 பந்துகளில் 29 ரன்களும் குவித்து கடைசி வரை அவுட்
ஆகாமல் இருந்தனர்.
–
——————————-
தினமணி