கட்அவுட் கலாச்சாரத்திற்கு முற்றுப்புள்ளி

மீண்டும் முதல்வராக பொறுப்பேற்ற ஜெயலலிதா,
அண்ணாசாலையில் உள்ள எம்.ஜி.ஆர் சிலைக்கு
கடந்த 21-ம் தேதி மாலை போட வந்தார்.
-
அப்போது சாலையில் எந்த கட்அவுட்டையும் பார்க்க
முடியவில்லை. எம்.ஜி.ஆர் சிலையைச் சுற்றி தடுப்பு
வேலியை மட்டும் போலீஸார் அமைத்திருந்தார்கள்.
'முதல்வர் வரப் போகிறார்' என்பதை நினைவூட்டும்
வகையிலேயே இருந்தது.
-
இது பொதுமக்கள் மத்தியில் ஆச்சரியத்தை ஏற்படுத்தியது.
இன்று மதியம் முதலமைச்சராக பதவியேற்க இருக்கிறார்
ஜெயலலிதா. விழா நடக்கும் சென்னைப் பல்கலைக்கழக
மண்டபத்தில் இருந்து போயஸ் கார்டன் வரையிலும்
பேனர், கட்அவுட் என எதுவுமே கண்ணில் தென்படவில்லை.
அ.தி.மு.கவின் இந்த அணுகுமுறையை சென்னைவாசிகள்
அதிசயத்தோடு பார்த்துச் செல்கிறார்கள்.
-
இதுபற்றி அ.தி.மு.கவின் தலைமைக்கழக பேச்சாளர்
ஆவடி குமாரிடம் கேட்டோம். " உண்மைதான். அம்மா
பங்கேற்க வரும் நிகழ்வுகளில் கட்சிக்காரர்கள் விதி
முறைகளை மீறி கட்அவுட் வைப்பதால் தேவையற்ற
சர்ச்சைகள் எழுந்தன. அதிகப்படியான பேனர்களை
வைப்பதால் பொதுமக்களுக்கு சிரமம் ஏற்படுகிறது என்று,
எதிரிகள் இதனை ஓர் ஆயுதமாக பயன்படுத்திக் கொண்டனர்.
-
எனவே, 'வரும் காலங்களில் கட்அவுட் பேனர் வைக்க
வேண்டாம்' என அம்மா உத்தரவிட்டுள்ளார். அதைத்தான்
நிர்வாகிகள் பின்பற்றுகிறார்கள்" என்றார்.
-
சட்டமன்ற தேர்தல் பிரசாரத்தில், ' மக்களால் நான்,
மக்களுக்காக நான்' என்ற கருத்தை அடிநாதமாக முழங்கினார்
ஜெயலலிதா.
-
ஆட்சியின் தொடக்கத்திலேயே அதை நடைமுறைப்படுத்தத்
தொடங்கியிருப்பது ஒரு நல்ல முன்னேற்றம்தான்.
-
------------------------------------
ஆ.விஜயானந்த்

விகடன்