மக்கள் மீது வரிச்சுமையை உயர்த்திய மத்திய அரசு

மக்கள் மீது வரிச்சுமையை மத்திய அரசு அதிகரித்திருப்பதாக
மேற்கு வங்க முதல்வர் மம்தா பானர்ஜி குற்றம் சாட்டினார்.

அரசின் அனைத்து நலத் திட்ட உதவிகளையும் பெறுவதற்கு
ஆதார் எண்ணை மத்திய அரசு கட்டாயமாக்கி இருப்பதாகவும்
அவர் குறை கூறினார்.

மேற்கு வங்கத்தில் மம்தா பானர்ஜி தலைமையிலான புதிய
அரசின் முதல் ஆய்வுக் கூட்டம், கொல்கத்தாவில் வெள்ளிக்
கிழமை நடைபெற்றது. இந்தக் கூட்டத்துக்குப் பிறகு மம்தா
கூறியதாவது:

சட்டப்பேரவைத் தேர்தலை முன்னிட்டு கடந்த சில மாதங்களாக
நிறுத்தி வைக்கப்பட்டிருந்த அனைத்து வளர்ச்சிப் பணிகளையும்
முடுக்கி விடுமாறு அதிகாரிகளுக்கு உத்தரவிட்டிருக்கிறேன்.

சேவை வரி, செஸ் வரி என்கிற பெயர்களில் மக்களின் செலவுகளை
மத்திய அரசு அதிகரிக்கச் செய்துவிட்டது. அரசின் அனைத்து நலத்
திட்ட உதவிகளையும் பெறுவற்கு ஆதார் எண்ணை மத்திய அரசு
கட்டாயமாக்கி உள்ளது.

எனினும், 20 முதல் 30 சதவீதம் வரையிலான மக்களுக்கு இன்னமும்
ஆதார் அட்டை வழங்கப்படவில்லை. இதனால், அரசின் நலத்திட்ட
உதவிகளையும், மானியங்களையும் பெற முடியாமல் ஏழை மக்கள்
பாதிக்கப்படுவார்கள்.

-
கடந்த நிதியாண்டுக்கான செலவுக்காக பட்ஜெட்டில் ரூ.49,507 கோடிக்கு
மாநில அரசு திட்டமிட்டிருந்தது. ஆனால், அதைவிட 15 சதவீதம் அதிகமாக,
ரூ.53,010 கோடி செலவு செய்யப்பட்டுள்ளது.

வேறு எந்த மாநிலமும் இதுபோன்று செலவு செய்ததில்லை என்று
மம்தா பானர்ஜி கூறினார்.
-
---------------------------------------
தினமணி