27 தனித்தமிழ் அறிஞர்களுக்கு மறைமலை அடிகள் விருது

-
தஞ்சாவூர் பழைய பேருந்து நிலையம் அருகேயுள்ள
அறிஞர் அண்ணா நூற்றாண்டு அரங்கத்தில் உலகத் தமிழர்
பேரமைப்பு சார்பில் சனிக்கிழமை நடைபெற்ற தனித்தமிழ்
இயக்க நூற்றாண்டு விழா மாநாட்டின் இரண்டாம் நாள்
நிகழ்சியில் 27 தனித்தமிழ் அறிஞர்களுக்கு மறைமலை அடிகள்
விருது வழங்கப்பட்டது.

இந்த மாநாட்டின் இரண்டாம் நாள் நிகழ்ச்சியின் தொடக்கமாக
உலகத் தமிழர் பேரமைப்புத் தலைவர் பழ. நெடுமாறன் எழுதிய
வள்ளலார் மூட்டிய புரட்சி, முனைவர் கு. அரசேந்திரன் எழுதிய
தமிழும் இந்தோ ஐரோப்பிய மொழிகளும், தொல்காப்பியம் -
வேர்ச் சொல்லாய்வு நோக்கு, பத்தாயிரம் ஆண்டுகட்கு முற்பட்ட
தமிழ் - இந்தோ ஐரோப்பிய உறவு ஆகிய நூல்கள் வெளியிடப்பட்டன.

பின்னர், நடைபெற்ற மொழித் தூய்மைக் கோட்பாடும், இயக்கங்களும்
என்ற தலைப்பிலான கருத்தரங்கத்துக்கு முனைவர்
இரா.இளங்குமரனார் தலைமை வகித்தார். முனைவர் வீ.அரசு
தொடக்கவுரை ஆற்றினார்.

தொடர்ந்து, தனித்தமிழியக்க முன்னோடிகள் என்ற தலைப்பிலான
கருத்தரங்கத்துக்குப் புலவர் க.முருகேசன் தலைமை வகித்தார்.
அன்புவாணன் வெற்றிச்செல்வி தொடக்கவுரை ஆற்றினார்.

மாலையில், கவிஞர் காசி ஆனந்தன் தலைமையில், வீர.சந்தனம்
முன்னிலையில் 27 தனித்தமிழ் அறிஞர்களுக்கு மறைமலை அடிகள்
விருது வழங்கி கெüரவிக்கப்பட்டது.

பின்னர், தனித்தமிழியக்கத் தோற்றமும், வளர்ச்சியும் என்ற தலைப்பில்
கருத்தரங்கம் நடைபெற்றது.

இரவு நடைபெற்ற நிகழ்வில், பேராசிரியர் ம.இலெ.தங்கப்பா, முனைவர்
இரா.மதிவாணன், பேராசிரியர் ப. அருளி ஆகியோருக்கு உலகப்
பெருந்தமிழர் விருதை உலகத் தமிழர் பேரமைப்புத் தலைவர்
பழ.நெடுமாறன் வழங்கினார்.

நிறைவு நாளான ஞாயிற்றுக்கிழமை உலகத் தமிழர் பேரமைப்பின்
9-ஆம் மாநாடு நடைபெறவுள்ளது.
-
---------------------------------
தினமணி