42 புரோட்டா சாப்பிட்டவருக்கு ரூ.5000 பரிசு

திருநெல்வேலி :

நெல்லையில் புரோட்டா சாப்பிடும் போட்டியில், 42 புரோட்டாக்கள் சாப்பிட்டவர், 5 ஆயிரம் ரூபாய் பரிசினை வென்றார். நெல்லை மாவட்டம் கல்லிடைகுறிச்சி யில், நாச்சியார் புரோட்டா ஸ்டால்காரர் புரோட்டா சாப்பிடும் போட்டி நடத்தினார். 5 ஆயிரம் ரூபாய் பரிசு அறிவிக்கப்பட்டது. காலை 11 மணி முதல் இரவு 9 மணிவரை போட்டி நடந்தது. மணிமுத்தாறு பயிற்சி போலீசார் உட்பட 60க்கும் மேற்பட்டோர் பங்கேற்றனர். சாப்பிடுவோர், ஒரு

புரோட்டாவிற்கு 5 ரூபாய் வீதம் பில் தொகையை செலுத்திவிட வேண்டும். அதிகம் சாப்பிடுபவருக்கு பரிசு என அறிவிக்கப்பட்டிருந்தது. விக்கிரமசிங்கபுரத்தை சேர்ந்த கோதர்மைதீன், 42 புரோட்டாக்கள் சாப்பிட்டு, 5 ஆயிரம் ரூபாய் பரிசு வென்றார். புரோட்டாக்கடை முன் வேடிக்கை பார்க்கவும் கூட்டம் கூடிவிட்டது. போலீசார் பாதுகாப்பிற்கு நின்றனர்.

போட்டியை நடத்திய கடைக்காரர் மோசஸ் கூறுகையில், ”வழக்கமானதை விட இரண்டு மடங்கு விற்பனை நடந்தது. போஸ்டர், விளம்பரம் என செலவு செய்திருந்தேன். 5 ஆயிரம் ரூபாய் பரிசுத்தொகை தந்ததால் லாபம் கிடையாது. எல்லாம் சும்மா ஒரு பப்ளிசிட்டிதான்,” என்றார்.

தினமலர்