அமெரிக்காவுக்கான இந்திய தூதராக நவ்தேஜ் சர்னா நியமனம்

புதுடில்லி:
அமெரிக்காவுக்கான இந்திய தூதராக, நவ்தேஜ் சர்னா
நியமிக்கப்பட்டுள்ளார். தற்போது அவர் இங்கிலாந்துக்கான
இந்திய தூதராக உள்ளார்.

அமெரிக்காவுக்கான இந்திய தூதராக இருந்த அருண் குமார் சிங்
கடந்த மாதம் ஓய்வு பெற்றார். இதனையடுத்து நவ்தேஜ் சர்னா
அமெரிக்காவுக்கான தூதராக நியமிக்கப்பட்டுள்ளார்.

இவர் விரைவில் தனது பொறுப்பை ஏற்றுக்கொள்வார் என வெளியுறவு
அமைச்சகம் வெளியிட்ட செய்தியில் கூறப்பட்டுள்ளது. இவரும்,
அருண் குமார் சிங்கும் முன்னர் இஸ்ரேல் நாட்டு தூதராக
பணியாற்றியுள்ளனர். இஸ்ரேல், அமெரிக்காவின் நெருங்கிய நட்பு
நாடாகும்.

கடந்த எட்டு மாதத்திற்கு முன்பு தான் இஸ்ரேலிலிருந்து, லண்டனுக்கு
மாற்றப்பட்டுள்ளார். அதற்கு முன் அவர் வெளியுறவு அமைச்சகத்தின்
மேற்கு பிராந்திய செயலாளராக பணியாற்றினார். கடந்த அக்டோபர்
மாதம் இந்தியா - ஆப்ரிக்கா மாநாட்டை வெற்றிகரமாக நடத்தி முடித்து
அனைவரது கவனத்தை ஈர்த்தார்.

இந்த மாநாட்டில், 53 ஆப்ரிக்கா நாடுகள் பங்கேற்றன.
கடந்த 2002 முதல் 2008 ம் ஆண்டு வரை, வெளியுறவு அமைச்சகத்தின்
செய்தி தொடர்பாளராக பணியாற்றினார். இவர் தான் வெளியுறவு
அமைச்சகத்தின் செய்தி தொடர்பாளராக நீண்ட நாட்கள் பணியாற்றியவர்.
இவர் மாஸ்கோ, வர்சாவ், டெஹ்ரான், ஜெனிவா மற்றும் திம்புவிலும்
பணியாற்றியுள்ளார்.
-
------------------------------
தினமலர்