அமைச்சர் உமா பாரதியை கைது செய்ய தடை

போபால்:
அவதுாறு வழக்கில், மத்திய அமைச்சர் உமா பாரதியை
கைது செய்ய, மாஜிஸ்திரேட் கோர்ட் பிறப்பித்த உத்தரவுக்கு,
மாவட்ட கோர்ட் தடை விதித்துள்ளது.

ஆஜராக உத்தரவு:
மத்திய பிரதேசத்தில், பா.ஜ.,வை சேர்ந்த முதல்வர்
சிவ்ராஜ் சிங் சவுகான் தலைமையிலான ஆட்சி நடக்கிறது.
இங்கு, 2003ல் நடந்த சட்டசபை தேர்தலில், பா.ஜ., முதல்வர்
வேட்பாளராக, தற்போது மத்திய நீர்வளத்துறை அமைச்சராக
உள்ள, உமா பாரதி முன்னிறுத்தப்பட்டார்.

தேர்தல் பிரசாரத்தில் பேசிய உமா பாரதி, காங்கிரஸ் கட்சியின்,
ம.பி., முன்னாள் முதல்வர் திக்விஜய் சிங் குறித்து, அவதுாறாக
பேசியதாக, வழக்கு தொடரப்பட்டது. விசாரித்த மாஜிஸ்திரேட்
கோர்ட், உமா பாரதி, ஆஜராக உத்தரவிட்டது.

'காவிரி பிரச்னை குறித்து, தமிழகம், கர்நாடகா இடையிலான
பேச்சில் பங்கேற்க, உமா பாரதிக்கு, மத்திய அரசு
உத்தரவிட்டிருப்பதால், அவரால் கோர்ட்டில் ஆஜராக முடியவில்லை'
என, அவர் வழக்கறிஞர் தெரிவித்தார்.

மனு தாக்கல்:
இதை ஏற்க மறுத்த மாஜிஸ்திரேட் கோர்ட், உமா பாரதியை
கைது செய்ய உத்தரவிட்டது. இதை எதிர்த்து, உமா பாரதி சார்பில்,
மாவட்ட கோர்ட்டில், மனு தாக்கல் செய்யப்பட்டது.
விசாரித்த மாவட்ட கோர்ட், உமா பாரதியை கைது செய்ய தடை
விதித்துள்ளது.
-
-------------------------------------
தினமலர்