ஜெ., ஸ்டிக்கருக்கு காத்திருந்த அமைச்சர் கரூரில் மாற்றுத்திறனாளிகள் பரிதவிப்பு

கரூர்,
கரூரில் நடந்த நிகழ்ச்சியில், ஸ்கூட்டருக்கு ஜெ., ஸ்டிக்கர்
ஒட்டுவதற்காக அமைச்சர் காத்திருந்த நிலையில்,
பயனாளிகளான மாற்றித்திறனாளிகள் பரிதவித்தனர்.

கரூர் கலெக்டர் அலுவலகத்தில், நேற்று காலை, 10:30 மணிக்கு
மாற்றுத்திறனாளிக்கு இலவச மூன்று சக்கர, 'ஸ்கூட்டர்' வழங்கும்
நிகழ்ச்சி நடப்பதாக அறிவிக்கப்பட்டது.

நிகழ்ச்சி துவங்க இருந்த நிலையில், ஸ்கூட்டரில், முன்னாள்
முதல்வர் ஜெயலலிதாவின், 'ஸ்டிக்கர்' ஒட்டப்படாமல் இருந்ததை
பார்த்த கட்சியினர், அமைச்சர் போக்குவரத்து அமைச்சர்
விஜயபாஸ்கரிடம் தெரிவித்தனர்.

உடனடியாக ஜெ., ஸ்டிக்கரை ஒட்டும்படி உத்தரவிட்டார்.
அப்போது, அதிகாரிகளிடம் ஜெ., ஸ்டிக்கர் இல்லாததால்,
அதை வாங்கி வர பணியாளர்கள் கடைக்கு அனுப்பினர்.

இருப்பினும், 45 நிமிடங்கள் கடந்த நிலையில், 'ஸ்டிக்கர்' வாங்க
சென்றவர்கள் திரும்பவில்லை.

இதனால், கூட்டரங்கில் சலசலப்பு ஏற்பட்டது; மாற்றுத்திறனாளிகள்
நீண்ட நேரம் உட்காரவோ, நிற்கவோ முடியாமல் பரிதவித்தனர்.

இதை பார்த்த அமைச்சர், வேறுவழியின்றி காலை, 11:15 மணிக்கு
நிகழ்ச்சியை துவங்கி, மாற்றுத்திறனாளிகளுக்கு, 'ஸ்கூட்டர்'
வழங்கினார். சிறிது நேரத்தில், 'ஸ்டிக்கர்' வந்து சேர்ந்தது. அமைச்சர்
கிளம்பிய பின், ஜெ., ஸ்டிக்கர் ஒட்டப்பட்டு, 'ஸ்கூட்டர்' வினியோகம்
செய்யப்பட்டது.
-
----------------------------------
தினமலர்