ஹிலாரிக்கு எதிராக விசாரணை கிடையாது; டிரம்ப் முடிவு

வாஷிங்டன்:
அரசு பணிகளுக்கு தனியார் இ- மெயில் சர்வரை
பயன்படுத்தியது தொடர்பாக முன்னாள் வெளியுறவு
அமைச்சர் ஹிலாரி மீது விசாரணை நடத்தப்பட
மாட்டாது என டிரம்ப்பிற்கு நெருக்கமான ஊழியர்
ஒருவர் கூறியுள்ளார்.

குற்றச்சாட்டு:

அமெரிக்காவின் வெளியுறவு அமைச்சராக
ஹிலாரி கிளிண்டன் இருந்த போது, அரசு பணிகளுக்கு
தனியார் இ-மெயில் சர்வரை பயன்படுத்தியதாக புகார்
எழுந்தது. இது தொடர்பாக எப்.பி.ஐ., விசாரைண நடத்தியது.

இதில் எந்தவித ஆதாரமும் இல்லை என அறிவிக்கப்பட்டது.
தொடர்ந்து, அமெரிக்க அதிபர் தேர்தலில் ஜனநாயக கட்சி
வேட்பாளராக ஹிலாரி கிளிண்டனும், குடியரசு கட்சி சார்பில்
டொனால்ட் டிரம்ப்பும் போட்டியிட்டனர்.

பிரசாரத்தின் போது, இமெயில் சர்வரை பயன்படுத்தியது
தொடர்பாக விசாரணை நடத்தி ஹிலாரியை சிறையில்
அடைப்பேன் என டிரம்ப் கூறினார். இதனால் பரபரப்பு
ஏற்பட்டது.

இமெயில் விவகாரத்தை மீண்டும் விசாரணை நடத்தப்
போவதாக அறிவித்த எப்.பி.ஐ., பின்னர் இதற்கான முகாந்திரம்
இல்லை எனக்கூறி கைவிட்டது.

தேர்தலில் டொனால்ட் டிரம்ப் வெற்றி பெற்று அதிபராக
பதவியேற்க உள்ளார்.

டிரம்ப்பிற்கு நெருக்கமானவரும், மூத்த ஆலோசகருமான
கெல்லியானே கோன்வே டிவிக்கு அளித்த பேட்டி:

இமெயில் விவகாரத்தில், ஹிலாரி பங்கு குறித்து மீண்டும்
விசாரணை நடத்தும் எண்ணம் டிரம்பிற்கு இல்லை.
இது அனைத்து உறுப்பினர்களுக்கும் தெரிவிக்கப்பட்டு விட்டது.
இன்னும் ஏராளமான அமெரிக்கர்களுக்கு ஹிலாரி
நேர்மையானவர் அல்லது நம்பத்தகுந்தவர் என்ற எண்ணமில்லை
எனக்கூறினார்
-
-----------------------------------
தினமலர்