பழைய நோட்டுகளை டெபாசிட் செய்யும் கட்சிகளுக்கு மட்டும் வரிவிலக்கு ஏன்? மம்தா கேள்வி

அரசியல் கட்சிகளால் டெபாசிட் செய்யப்படும் பழைய
ரூ.500, ரூ.1000 நோட்டுகளுக்கு மட்டும் வருமான வரி
விலக்கு அளிக்கப்படுவது ஏன்?
என்று மேற்கு வங்க முதல்வர் மம்தா பானர்ஜி கேள்வி
எழுப்பியுள்ளார்.

ரூ.500, ரூ.1000 நோட்டுகள் செல்லாது என்று மத்திய அரசு
கடந்த மாதம் அறிவித்தது.

இந்நிலையில், அரசியல் கட்சிகளுக்கு தனிநபர்கள் பழைய
நோட்டுகளாக வழங்கும் அன்பளிப்பு ரூ.20 ஆயிரத்துக்கும்
குறைவாகவும், உரிய ஆவணங்களுடனும் இருந்தால் அதற்கு
வருமான வரிவிலக்கு அளிக்கப்படும் என்று மத்திய
வருவாய்த் துறை செயலர் ஹஸ்முக் அதியா வெள்ளிக்கிழமை
தெரிவித்திருந்தார்.

இதற்கு கடும் எதிர்ப்பு தெரிவித்த மம்தா பானர்ஜி,
சுட்டுரையில் சனிக்கிழமை வெளியிட்ட தனது தொடர்
பதிவுகளில் குறிப்பிட்டுள்ளதாவது: ரூ.500, ரூ.1000 செல்லாத
நோட்டுகள் என்றால் அது அனைவருக்கும் செல்லாதவையாக
இருக்க வேண்டும்.
அதில் அரசியல் கட்சிகளுக்கு மட்டும் விதிவிலக்கு ஏன்?

அதிக மதிப்புடைய ரூபாய் நோட்டுகள் சட்டவிரோதம் என்றால்,
சாமானிய மக்களுக்கும், அரசியல் கட்சியினருக்கும் பாகுபாடு
காட்ட மத்திய அரசு முயல்வது ஏன்?

அரசியல் கட்சிகளுக்கு வருமான வரி விலக்கு என்று மத்திய
அரசு அறிவித்துள்ள சமயத்தைப் பார்த்தால், அந்த
அறிவிப்புக்குப் பின்பு ஏதோ உள்நோக்கம் இருப்பதாகத் தெரிகிறது.

இந்த அறிவிப்பின் மூலம் ஒரு குறிப்பிட்ட அரசியல் கட்சியின்
(பாஜக) நிர்வாகிகளுக்கும், தொண்டர்களுக்கும் மறைமுகமாக
ஏதேனும் கூற மத்திய அரசு முயற்சிக்கிறதா? என்ற கேள்வி
எழுகிறது.

மூத்த அரசு அதிகாரிகளிடம் இருந்து இதுபோன்ற குழப்பமான
மற்றும் தவறாக வழிநடத்தக் கூடிய அறிவிப்புகள் வெளியிடப்படுவது
மிகவும் துரதிருஷ்டவசமானது. இந்த அறிவிப்புக்கான காரணத்தை
மத்திய அரசு தெளிவுபடுத்த வேண்டும் என்று தனது பதிவுகளில்
மம்தா சரமாரியாக கேள்வி எழுப்பியுள்ளார்.
-
-----------------------------------------
தினமணி