ஜல்லிக்கட்டுக்கு பேரவையில் சட்டம்: முதல்வர் ஓ.பன்னீர்செல்வம் உறுதி

ஜல்லிக்கட்டுக்கு கொண்டுவரப்பட்டுள்ள அவசரச் சட்டம்,
திங்கள்கிழமை கூடவுள்ள சட்டப்பேரவை கூட்டத் தொடரிலேயே
சட்டமாக்கப்பட்டு, குடியரசுத் தலைவரின் ஒப்புதலும் பெறப்படும்
என முதல்வர் ஓ.பன்னீர்செல்வம் உறுதி கூறினார்.
-
ஒரு சட்டம் சட்டப்பேரவையில் நிறைவேற்றுவதற்கு முன்னர்,
கொண்டுவரப்பட வேண்டும் என்றால் அவசரச் சட்டமாகத்தான்
கொண்டவர முடியும். பின்னர் அந்த அவரச் சட்டத்துக்கு
6 மாதங்களுக்குள் சட்டப்பேரவை கூட்டத்தொடரில் சட்ட முன்வடிவு
கொண்டுவரப்பட்டு சட்டமாக்கப்படவேண்டும்.

அதன்படி, அவசரச் சட்டத்துக்கு திங்கள்கிழமை கூடவிருக்கும்
சட்டப்பேரவை கூட்டத் தொடரில் சட்ட முன்வடிவு வரைவு கொண்டு
வரப்பட்டு, சட்டமாக்கப்பட்டு குடியரசுத் தலைவரின் ஒப்புதலும்
பெறப்படும் என்றார் அவர்.

மக்கள் விரும்பும் நாளில் அலங்காநல்லூரில் ஜல்லிக்கட்டு

முன்னதாக மதுரையில் பேட்டியளித்த முதல்வர் ஓ.பன்னீர்செல்வம்,
மக்கள் விரும்பும் நாளில் அலங்காநல்லூரில் ஜல்லிக்கட்டு நடத்தப்படும்
என்று தெரிவித்தார்.

ஜல்லிக்கட்டுக்கு இருந்த தடை முழுவதுமாக நீக்கப்பட்டுள்ளது.
தமிழக அரசு கொண்டு வந்துள்ள அவசரச் சட்டம் தாற்காலிகமானது
அல்ல. அது நீடித்த, நிலையான சட்டம். வரக் கூடிய சட்டப்பேரவைக்
கூட்டத் தொடரில் சட்ட முன்வரைவு கொண்டு வரப்பட்டு சட்டம்
இயற்றப்படும்.

ஜல்லிக்கட்டுக்கு எதிராக எந்த அமைப்பும் எத்தகைய முயற்சியை
எடுத்தாலும் அதை தமிழக அரசு முறியடிக்கும் என்றார்.
-
-----------------------------------------------------
தினமணி