குஜராத் பேரவையில் அமளி: 50 காங்கிரஸ் எம்எல்ஏக்கள் இடைநீக்கம்

by rammalar Wed Aug 24, 2016 10:09 pm

குஜராத் மாநில சட்டப்பேரவையில், தலித் விவகாரத்தை
முன்னிறுத்தி அமளியில் ஈடுபட்ட காங்கிரஸ் எம்எல்ஏ-க்கள்
50 பேரை பேரவைத் தலைவர் ரமண்லால் வோரா செவ்வாய்க்
கிழமை இடைநீக்கம் செய்தார்.
-
குஜராத் மாநிலம், உனா பகுதியில் இறந்த மாட்டின் தோலை
உரித்ததாகக் கூறி தலித் இளைஞர்கள் மீது சிலர் தாக்குதல்
நடத்தினர். நாடு முழுவதும் பலத்த விமர்சனங்களை எழுப்பிய
இந்தச் சம்பவம் குஜராத் சட்டப்பேரவையிலும் எதிரொலித்தது.
-
பேரவை அலுவல்கள் செவ்வாய்க்கிழமை தொடங்கியதும்,
இந்த விவகாரம் குறித்து விவாதிக்குமாறு காங்கிரஸ்
உறுப்பினர்கள் குரல் எழுப்பினர். அதற்கு பேரவைத் தலைவர்
ரமண்லால் வோரா அனுமதி மறுக்கவே, அவையின் மையப்
பகுதிக்குச் சென்ற காங்கிரஸ் எம்எல்ஏ-க்கள் மத்திய, மாநில
அரசுக்கு எதிராக முழக்கங்களை எழுப்பினர்.
-
அப்போது, இதுதொடர்பான வாசகங்கள் அடங்கிய
பதாகைகளையும் அவர்கள் கைகளில் ஏந்தியிருந்தனர்.
-
பேரவைத் தலைவரின் இருக்கையை முற்றுகையிட்டும்,
அமைச்சர்கள் மீது வளையல்களை வீசி எறிந்தும் அவர்கள்
அமளியில் ஈடுபட்டனர். இதையடுத்து அவர்களை எச்சரித்த
ரமண்லால் வோரா, அவை நடவடிக்கைகளுக்கு ஊறு விளைவிக்க
வேண்டாம் என்று அறிவுறுத்தினார்.
-
ஆனால், காங்கிரஸ் உறுப்பினர்கள் தொடர்ந்து கூச்சல், குழப்பத்தில்
ஈடுபடவே, அவர்கள் அனைவரையும் வெளியேற்றுமாறு அவைக்
காவலர்களுக்கு அவர் உத்தரவிட்டார். மேலும், அமளியில் ஈடுபட்ட
காங்கிரஸ் எம்எல்ஏக்கள் 50 பேரை நாள் முழுவதும் இடைநீக்கம்
செய்தும் அவர் உத்தரவிட்டார்.
-
400 பேர் கைது:

இதனிடையே, மாநிலத்தில் தலித் மக்கள் மீதான தாக்குதல்
அதிகரித்திருப்பதாகக் கூறி குஜராத் சட்டப்பேரவையை நோக்கி
கண்டனப் பேரணி நடத்திய காங்கிரஸ் கட்சியைச் சேர்ந்த
400 பேரை போலீஸார் செவ்வாய்க்கிழமை கைது செய்தனர்.
பேரணியில் ஈடுபட்டவர்கள் மாநில அரசையும், மத்திய அரசையும்
விமர்சித்து முழக்கங்களை எழுப்பினர்.

கைது செய்யப்பட்ட அனைவரும் சிறிது நேரத்துக்குப் பிறகு
விடுவிக்கப்பட்டனர்.
-
------------------------------------------
தினமணி