18 வயது நிரம்பியவர்களுக்கு மோடி வேண்டுகோள் ‘வாக்காளர்களாக பதிவு செய்யுங்கள்’

புதுடெல்லி

மக்களிடையே வாக்குரிமை குறித்த விழிப்புணர்வை
ஏற்படுத்தும் விதமாக ஆண்டு தோறும் ஜனவரி 25-ந்தேதி
தேசிய வாக்காளர் தினம் அனுசரிக்கப்படுகிறது.
அந்த வகையில் நேற்று நாடு முழுவதும் தேசிய வாக்காளர்
தினம் அனுசரிக்கப்பட்டது.

இதையொட்டி பிரதமர் நரேந்திர மோடி நாட்டு மக்கள்
அனைவருக்கும் வாழ்த்து தெரிவித்தார்.

அவர் தனது டுவிட்டர் பக்கத்தில் “தேசிய வாக்காளர்
தினத்திற்காக அனைவருக்கும் வாழ்த்துகள். நமது
ஜனநாயகத்தில் முக்கிய பங்கு வகிக்கும் தேர்தல்
கமிஷனுக்கு வாழ்த்துகளையும், வணக்கங்களையும்
நாம் தெரிவிப்போம்.

தேர்தல்கள் ஜனநாயகத்தின் கொண்டாட்டங்களாக
திகழ்ந்து வருகின்றன. அவை மக்களின் எண்ணங்களை
பிரதிபலிப்பவையாக உள்ளன. தேர்தல்கள் தான்
ஜனநாயகத்தில் முதன்மையானவை” என குறிப்பிட்டு
உள்ளார்.

மேலும் அவர் “18 வயது நிரம்பிய, வாக்களிக்க தகுதி
பெற்ற அனைவரும் தங்களை வாக்காளர்களாக பதிவு
செய்து கொள்ளுங்கள். பின்னர் தேர்தல் நேரத்தில்
உங்கள் வாக்குரிமையை நிலைநாட்டுவதோடு,
வாக்களிக்க தகுதி பெற்ற உங்கள் நண்பர்கள் மற்றும்
உறவினர்களையும் வாக்களிக்க செய்யுங்கள் என
வேண்டிக்கேட்டுக்கொள்கிறேன்” எனவும் தெரிவித்து
உள்ளார்.
-
----------------------------------
தினத்தந்தி