ரூ.5 லட்சத்துக்கு மேல் நகை வாங்கினால் மட்டுமே பான் கார்டை கட்டாயமாக்க வேண்டும்

மத்திய அரசின் புதிய பட்ஜெட்டில், ரூ.5 லட்சத்துக்கு மேல் தங்கம்
வாங்குபவர்களுக்கு மட்டுமே நிரந்தர வருமான வரிக் கணக்கு எண்
(பான்) சமர்ப்பிப்பதைக் கட்டாயமாக்க வேண்டும் என்று நகை
வியாபாரிகள் வலியுறுத்தியுள்ளனர்.

இதுகுறித்து அகில இந்திய நகை வியாபாரிகள் சம்மேளனத்தின்
தலைவர் நிதின் கண்டேல்வால் கூறியதாவது:

ரூ.2 லட்சத்துக்கும் மேல் நகை வாங்குபவர்கள், தங்களது நிரந்தர
வருமான வரிக் கணக்கு எண்ணை (பான்) சமர்ப்பிக்க வேண்டும்
என்ற புதிய நிபந்தனையால் நகை வணிகத் துறை பின்னடைவைச்
சந்தித்து வருகிறது.

எனவே, எதிர்வரும் மத்திய பட்ஜெட்டில் பான் எண்ணைச்
சமர்ப்பிப்பதற்கான கொள்முதல் உச்சவரம்பை ரூ.5 லட்சமாக
உயர்த்த வேண்டும்.

மேலும், ஆபரணத் தங்கத்தின் மீதான 10 சதவீத இறக்குமதி வரி,
நகை வணிகத் துறையில் மிகப் பெரிய பாதிப்பை ஏற்படுத்தியுள்ளது.
இது தங்கக் கடத்தல், கருப்புச் சந்தை ஆகியவற்றுக்கு வழிவகுக்கிறது.

எனவே, புதிய பட்ஜெட்டில் இறக்குமதி வரியை 10 சதவீதத்திலிருந்து
5 சதவீதமாகக் குறைக்க வேண்டும் என்றார் அவர்.
-
---------------------------------------
தினமணி