மெரினா ஆகுமா ஜந்தர்மந்தர் :

புதுடில்லி :
டில்லியில் போராட்டம் நடத்தி வரும் தமிழக விவசாயிகளுக்கு
நாடு முழுவதிலும் ஆதரவு பெருகி வருகிறது.

தொடரும் போராட்டம்:
தமிழக வறட்சி நிவாரணம், விவசாய கடன் தள்ளுபடி உள்ளிட்ட
கோரிக்கைகளை வலியுறுத்தி டில்லி ஜந்தர்மந்தரில் தமிழக
விவசாயிகள், 14வது நாளாக இன்றும் அரைநிர்வாண போராட்டம்
நடத்தி வருகின்றனர்.

விவசாயிகளுக்காக போராட்டம் நடத்தும் இவர்களை யாரும்
கண்டுகொள்ளவில்லை என புகார் எழுந்தது. இதனையடுத்து

தமிழக எம்.பி.,க்கள், தென்னிந்திய சினிமா நடிகர் சங்கத்தினர்,
தமிழக அரசியல் கட்சி தலைவர்கள் சிலர் நேரில் சென்று
சந்தித்தனர். நேற்று விவசாயிகளை சந்தித்த மதிமுக பொதுச்
செயலாளர் வைகோ, இன்று மத்திய அமைச்சர்
அருண் ஜெட்லியை நேரில் சந்தித்து விவசாயிகள் கோரிக்கைகளை
நிறைவேற்ற வலியுறுத்தி உள்ளார்.

கைகோர்க்கும் விவசாயிகள் :

டில்லியில் போராட்டம் நடத்தி வரும் தமிழக விவசாயிகளுக்கு
ஆதரவாக திருச்சி லால்குடி அருகே புள்ளப்பாடி பகுதியில்
விவசாயிகள் உண்ணாவிரத போராட்டத்தை இன்று துவக்கி உள்ளனர்.

இந்த போராட்டத்திற்கு போலீசார் அனுமதி மறுத்ததால் விவசாயிகள்
தர்ணா போராட்டத்திலும் ஈடுபட்டு வருகின்றனர். இந்நிலையில்
தமிழக விவசாயிகளுக்கு ஆதரவாக பல்வேறு மாநிலங்களைச் சேர்ந்த
விவசாயிகளும் டில்லி ஜந்தர்மந்தரில் குவிந்து வருகின்றனர்.

மெரினா ஆகுமா ஜந்தர்மந்தர் :

டில்லியில் போராடும் தமிழக விவசாயிகளுக்கு ஆதரவு தெரிவிப்பதற்காக
இளைஞர்கள் பலரும் ஜந்தர்மந்தரில் குவிந்து வருகின்றனர். தமிழக
இளைஞர்கள் பலரும் டில்லி சொல்ல உள்ளதாக கூறப்படுகிறது.

இதனால் ஜல்லிக்கட்டு போராட்டத்தின் போது சென்னை மெரினாவில்
கூடிய இளைஞர்கள் கூட்டத்தை போன்று டில்லி ஜந்தர்மந்தரிலும் கூட்டம்
கூட வாய்ப்பு இருப்பதாக கூறப்படுகிறது.
-
---------------------------------
தினமலர்