சென்னைக்கு மழை எப்போது?- தமிழ்நாடு வெதர்மேன்

அன்றாடம் செய்தித்தாள்களில் மதுரையில் மழை,
கன்னியாகுமரியில் மழை, வேலூரில் மழை என்ற
செய்திகளைப் பார்க்கும் சென்னைவாசிகளுக்கு
சென்னையில் எப்போது மழை பெய்யும் என்ற கேள்வி
எழுந்துள்ளது.

சென்னையில் எப்போதுதான் மழை பெய்யும் என்ற
கேள்வியோடு தமிழ்நாடு வெதர்மேன் பிரதீப் ஜானிடம்
சில கேள்விகளைக் கேட்டோம்.

அவர் கூறியதாவது:

சென்னையில் மழை பெய்ய வேண்டுமானால் அது கடலில்
இருந்து உருவாக வேண்டும். அதற்கு காற்றழுத்தத் தாழ்வு
நிலையோ அல்லது புயலோ கடலில் மையம் கொள்ள வேண்டும்.

அதற்கான சாதக சூழல் இப்போது இல்லை. கடல்பரப்பில் இல்லாது
நிலத்தில் இருந்து சென்னைக்கு மழை உருவாக வேண்டும் என்றால்,
உள்மாவட்டங்களில் தற்போது நிலைகொண்டுள்ள காற்று
சென்னையை நோக்கி நகர வேண்டும்.

ஜூன் மாதம் தென்மேற்கு பருவமழை உருவாகும்போது
உள்மாவட்டங்களில் உள்ள காற்று சென்னையை நோக்கி நகரும்
சூழல் ஏற்படும். அப்போது சென்னையில் மழை பெய்யும் சூழல்
ஏற்படும்.

அதுவரையில் உள்மாவட்டங்களோடு ஒப்பிட்டு நாம் மழையை
எதிர்பார்க்க வேண்டாம்.

இருப்பினும் நகரின் ஒருசில இடங்களில் இன்றோ அல்லது
நாளையோ லேசான மழைக்கு வாய்ப்பிருக்கிறது. அதுவும்,
உள்மாவட்டங்களில் பெய்யும் அளவுக்குக்கூட இருக்காது.

உள்மாவட்டங்களில் அடுத்த ஒரு வாரத்துக்கு மழை பெய்யும். நாளை
(புதன்கிழமை) காவிரி டெல்டா பகுதிகளிலும் மழைக்கு வாய்ப்பிருக்கிறது.
உள்மாவட்டங்களில் மட்டும் தொடர்ந்து மழை பெய்துவருவதற்கு
அப்பகுதியில் காற்று குவியும் நிலையே (wind convergence)
காரணம்.

சென்னையைப் பொறுத்தவரை தற்போது வெயிலின் தாக்கம் சற்று
குறைவாக இருக்கிறது. கத்திரி வெயில் தொடங்கியதில் இருந்தே
40 டிகிரி வெப்பம் என்ற அளவில் சென்னையில் வெயில் அடிக்கவில்லை.

ஆனால், வரும் 14-ம் தேதி (மே 14) முதல் கத்திரி வெயிலின் தாக்கம்
மேலும் அதிகரிக்கும். மே கடைசி வாரத்தில் சென்னையில் வெயிலின்
தாக்கம் அதிகமாக இருக்கும்.

இருப்பினும், என்று சில வாட்ஸ் அப் குரூப்களில் தகவல்
பரப்பப்படுவதுபோல் 42 டிகிரி செல்சியஸ், 50 டிகிரி செல்சியஸ் என்று
இருக்காது.

கடைசியாக கடந்த 2003-ம் ஆண்டு மே மாதம் சென்னையில் 42 டிகிரி
வெயில் அடித்தது. அதன்பிறகு சென்னையில் 42 டிகிரி அளவுக்கு
வெயில் அடிக்கவில்லை என்பது கவனிக்கத்தக்கது.

இவ்வாறு அவர் தெரிவித்தார்.
-
---------------------------