கபடியை ஊக்குவிக்க ஐகோர்ட் உத்தரவு

மதுரை:
‘தகுந்த காரணங்கள் இன்றி, தமிழர்களின் பாரம்பரிய
விளையாட்டான, கபடி போட்டி நடத்த போலீசார் அனுமதி
மறுக்கின்றனர்.

இதை தவிர்க்க வேண்டும். கபடியை ஊக்குவிக்க வேண்டும்’
என, உயர் நீதிமன்ற மதுரை கிளை உத்தரவிட்டுள்ளது.

சிவகங்கை, விருதுநகர், திருநெல்வேலி மாவட்டங்களில்,
கபடி போட்டி நடத்த அனுமதிக்க, போலீசாருக்கு உத்தரவிடக்
கோரி, பல்வேறு மனுக்கள் தாக்கல் செய்யப்பட்டன.
விசாரித்த நீதிபதிகள் ராஜா, வேல்முருகன் பெஞ்ச் பிறப்பித்த
உத்தரவு:

கபடி போட்டி தொடர்பாக, ஏற்கனவே இந்நீதிமன்றம் பல
வழிகாட்டுதல்களை வழங்கியுள்ளது. ஆனால், போலீசார் தகுந்த
காரணங்களின்றி மறுக்கின்றனர்; இதை அனுமதிக்க முடியாது.

நமது பாரம்பரிய விளையாட்டான கபடியை ஊக்குவிக்காமல்,
நிராகரிப்பது தவறு. ‘கிராமங்களில் ஜாதி, மதங்களைக் கடந்து,
இளைஞர்களிடையே ஒற்றுமையை ஏற்படுத்த, கபடி போன்ற
விளையாட்டு போட்டிகளை ஊக்குவிக்கும் வகையில், அனுமதி
அளிக்க, மாவட்ட போலீஸ் அதிகாரிகளுக்கு, டி.ஜி.பி., வழி
காட்டுதல்களை வழங்க வேண்டும்’ என, 2013ல், இந்நீதிமன்றம்
உத்தரவிட்டது. அதை பின்பற்றி, சுற்றறிக்கை அனுப்பப்பட்டது.

அதை முறையாக பின்பற்றாமல், தகுந்த காரணங்கள் இன்றி
போலீசார் அனுமதி மறுக்கின்றனர். இதனால், மீண்டும் மீண்டும்
நீதிமன்றத்தை நாட வேண்டிய நிலையை, போலீசார்
ஏற்படுத்துகின்றனர்; இதை தவிர்க்க வேண்டும். கபடி போட்டி
நடத்த, மனுதாரர்களுக்கு அனுமதி அளிக்கப்படுகிறது.

குறித்த நேரத்திற்குள், போட்டியை நடத்தி முடிக்க வேண்டும்.
ஜாதி, மதம், அரசியல் உணர்வுகளை துாண்டும் வகையில்,
கோஷங்கள் எழுப்பக்கூடாது.

பொது அமைதிக்கு பாதிப்பு ஏற்படும் வகையில், விரும்பத்தகாத
சம்பவங்கள் ஏதுவும் நடக்கக்கூடாது. முதலுதவி சிகிச்சைக்கு
ஏற்பாடு செய்ய வேண்டும். விதிகளை மீறினால், போலீசார்
தகுந்த நடவடிக்கை எடுக்க வேண்டும். இவ்வாறு நீதிபதிகள்
உத்தரவிட்டனர்.
–
———————————–
தினமலர்