வங்கியில் சம்பள திட்டம் ரேஷன் ஊழியர்கள் தர்ணா

கூட்டுறவு சங்க ரேஷன் கடைகளில் பணிபுரியும்
ஊழியர்களுக்கு, ரொக்கமாக சம்பளம் வழங்கப்படுகிறது.

இதில், அதிகாரிகள் முறைகேடு செய்வதாக கூறப்படுகிறது.
இதையடுத்து, வங்கியில் சம்பளம் வழங்கும்படி, ரேஷன்
ஊழியர்கள், அரசுக்கு கோரிக்கை விடுத்தனர்.

அதற்கான பணிகளை துவக்கிய, கூட்டுறவு சங்க அதிகாரிகள்,
இதுவரை செயல்படுத்தவில்லை.

இதுகுறித்து, தமிழ்நாடு அரசு நியாய விலை கடை பணியாளர்
சங்க தலைவர், ராஜேந்திரன் கூறியதாவது:எங்களின் தொடர்
கோரிக்கையை ஏற்று, நேரடியாக தருவதற்கு பதில், வங்கி
மூலம் சம்பளம் வழங்க, அதிகாரிகள் முடிவு செய்தனர்.

கூட்டுறவு அல்லது தேசிய வங்கிகள் மூலம் சம்பளத்தை
வழங்குவற்கான வழிவகைகளை ஆராய்ந்து, அறிக்கை அளிக்கும்படி,
ஏப்ரலில், மண்டல பதிவாளர்களுக்கு, உயரதிகாரிகள் கடிதம்
எழுதினர்.

அதோடு சரி, அடுத்தகட்ட பணிகள், இதுவரை மேற்கொள்ளப்
படவில்லை. எனவே, வங்கி மூலம் சம்பளம் வழங்குவதை
உடனே செயல்படுத்தக் கோரி, வரும், 9ல், ரேஷன் ஊழியர்கள்
தர்ணா போராட்டத்தில் ஈடுபடுவர்.இவ்வாறு அவர் கூறினார்.
-
---------------------------
- நமது நிருபர் -
தினமலர்