பாலாற்றில் ஆந்திராவின் தடுப்பணை: அதிகாரிகள் எச்சரித்தும் அரசு மவுனம்

பாலாற்றின் குறுக்கே, ஆந்திர அரசு புதிய தடுப்பணை
கட்டுவது குறித்து முன்கூட்டியே தகவல் அளித்தும்,
மாநில அரசு மெத்தனமாக இருந்துள்ளது.

பாலாற்றின் குறுக்கே, தடுப்பணை உட்பட, எந்த விதமான
கட்டுமானங்களையும், தமிழக அரசு அனுமதியின்றி
,கர்நாடகா மற்றும் ஆந்திர மாநில அரசுகள் மேற்கொள்ளக்
கூடாது. ஆனால்,

இந்த விதியை மீறி, ஆந்திர அரசு பாலாற்றின் குறுக்கே,
22 தடுப்பணைகளை கட்டியுள்ளது. இதனால், பாலாற்றில்
மேற்பரப்பு நீரோட்டமும், நிலத்தடி நீர்வளமும் குறைந்து,
வேலுார், திருவண்ணாமலை, திருவள்ளூர், காஞ்சிபுரம்
மாவட்டங்கள் பாதிக்கப்பட்டுள்ளன.

இந்நிலையில், வேலுார் மாவட்ட எல்லையில், குப்பம்
செல்லும் வழியில், 150 கோடி ரூபாயில், 50 அடி
உயரத்தில், இரண்டு புதிய தடுப்பணைகள் கட்டும் பணியை,
ஆந்திர அரசு துவக்கி உள்ளது.

இது, தமிழக விவசாயிகள் மற்றும் பொதுமக்கள் மத்தியில்
கடும் கொந்தளிப்பை ஏற்படுத்தியுள்ளது.

இது குறித்து, நீர்வளத்துறை அதிகாரி ஒருவர் கூறியதாவது:
ஆந்திர அரசு, பாலாற்றின் குறுக்கே தடுப்பணை கட்ட,
'டெண்டர்' கோருவது குறித்து, ஒரு மாதத்திற்கு முன்,
தமிழக பொதுப்பணித் துறையின் கீழ் இயங்கும்,
நீர்வளத்துறை அதிகாரிகள், துறையின் அமைச்சர் மற்றும்
செயலருக்கு தகவல் கொடுத்தனர்.

ஆனால், தமிழக அரசு மெத்தனமாக இருந்ததால்,
ஆந்திர அரசு பணிகளை தீவிரப்படுத்தி உள்ளது.
இனி வழக்கம் போல், தமிழக அரசு நீதிமன்றம் செல்ல
உள்ளது. ஆரம்பத்தில், கவனமாக இருந்திருந்தால்,
சிக்கல் ஏற்பட்டிருக்காது. இவ்வாறு அவர் கூறினார்.
-
-----------------------

-நமது நிருபர்-
தினமலர்