அருளே திருளே – கவிதை

தன்னோடு தான் புலம்பிக்கொண்டே
தைப்பவனின் வயித்தெரிச்சலுக்கு
காதுமலர்த்திக் கிடக்கிறது உதிரிச்செவ்வரளி
பலகையிடுக்கில் கிளைத்துப்பூத்து
சாம்பலுதிர்க்கும் ஊதுவத்தி
நதிக்கரை மரத்தடி என்றொரு
பொய்யை சாக்கடை மேல் விரிக்கப் பார்க்கிறது
கழற்றிக் கொடுத்துவிட்டு
சுகமாய் கடித்தடத்தை வருடியபடி
அட்டணங்காலிட்டமர்ந்திருக்கிறார் பாபா
‘சும்மாவேனும் சொல்லுங்கள் சாயிநாதா
அவன் காதோர பீடித்துணுக்கு
நிம்மதிப் பெருமூச்சாக
எவ்வளவு நேரமாகும்?’
–
———————-

– ஜான் சுந்தர்
நன்றி-குங்குமம்