புதியதோர் உலகு செய்வோம்!

-
வன்முறையின் உச்சத்தில் உலகம்...
வரம்பின்றி ஓடுகிறது குருதியாறு!
-
வயதுவரம்பின்றி
சாகின்றனர் மக்கள்
மனிதநேயம் குன்றியதால்
மிருகங்களாயினர் பலர்!
-
தாய்மொழி பேசியதால்
வாய்மொழியின்றி நின்றனர் சிலர்
வாழ்வே கேள்விக்குறியாய்!
-
பட்டம் வாங்கச் சென்றவர்களை
படுகொலை செய்தனர்
இனவெறியின் பிடியில்
இளைய சமுதாயம் மேலைநாடுகளில்!
-
மனமென்னும் நிலத்தில்
மதமென்னும் விதையை நட்டு
வெறியென்னும் அமிலம் விட்டால்
வேரோடு சாய்ந்து விடும்
மனிதச் சமுதாயம்!
-
உதரத்தில் துவங்கட்டும் மாற்றம்
உயர் பண்போடு பிறக்கட்டும் மொட்டுக்கள்
அன்பால் வெற்றிகொள் உலகை - உன்
பண்பால் பெருமைப்படும் நாடே!
-
பிறக்கும் போது பெருமையில்லை
பிறர் மதிக்கும்போதுதான்
பெருமையும் பிறக்கிறது!

தாய்மையோடு தாயகத்தையும் போற்றுவோம்
வாய்மையோடு தரணியையும் நேசிப்போம்
புதியதோர் உலகு செய்வோம்
போரிடும் செயலை போராடி வெல்வோம்
அமைதி பூங்காவாகட்டும் அகிலம்
அகிம்சையோடு வெற்றிகொள் உலகை!
-
---------------------------------
ரெஷ்மி சிவகுமார்,
வாரமலர்