திரைப்பட பாடல் மூலம் பிரிந்த தம்பதி இணைந்தனர்

உத்தரப்பிரதேசத்தின் ஜான்சி பகுதியைச் சேர்ந்த தம்பதியினர்
இடையே கருத்து வேறுபாடுகள் ஏற்பட்டதைத் தொடர்ந்து,
உறவினர்கள் சமரசம் பேசி அவர்களைச் சேர்த்துவைக்க
முயன்றனர்.

ஆனால், கணவன் மனைவி இடையே பிரச்சினை
பூதாகரமானதுதான் மிச்சம். இரண்டு மாதமாக நீடித்த பிரச்சினை,
காவல்நிலையம் வரை பஞ்சாயத்துக்குச் சென்றுவிட்டது.
கணவன்மீது மனைவி உள்ளூர் காவல்நிலையத்தில் புகார்
கொடுத்தார். இதைத் தொடர்ந்து இருவருக்கும் போலீஸ் சம்மன்
அனுப்பியது.

காவல்நிலையத்தின் குடும்ப நலப் பிரிவு அவர்களுக்கு
கவுன்சலிங் கொடுத்தது. ஆனாலும், மனைவியின் கோபம்
தீரவில்லை. அப்போதுதான் அந்த எதிர்பாராத காட்சி
அரங்கேறியது.

தன் மனைவியைப் பார்த்து அந்தக் கணவர் இந்திப் பாடல்
ஒன்றை சோகமாக பாடத் தொடங்கினார்
. ``நா சீக்ஹா ஜினா டெரி பினா” என்று அவர் பாடிய
பாடலுக்கு ‘உன்னைவிட்டுப் பிரிந்து வாழ நான் இன்னும்
கற்றுகொள்ளவில்லை’ என்று அர்த்தம்.

பாடலைக் கேட்ட மனைவி, மனம் உருகி அழுதுகொண்டே
தன் கணவரை அணைத்துக்கொண்டார்.

காவல்நிலையத்தில் தம்பதி ஒன்று சேர்ந்ததையடுத்து,
இனிப்பு வழங்கிக் கொண்டாடினர். இந்தக் காட்சியை
அங்கிருந்த காவலர் ஒருவர் வீடியோ எடுத்து சமூக
வலைதளங்களில் பகிர, வைரலாகிவிட்டது.
-
------------------------------
தினத்தந்தி