கைதிகளுக்கு, 'ஆதார்' கேரள அரசு திட்டம்

திருவனந்தபுரம் :
கேரளாவில், சிறை கைதிகளுக்கும், 'ஆதார்' வழங்கும் திட்டம்
அமல்படுத்தப்பட்டு உள்ளது.

கேரளாவில், முதல்வர் பினராயி விஜயன் தலைமையில்,
இடது ஜனநாயக முன்னணி ஆட்சி நடக்கிறது. இம்மாநில,
சிறைகள் துறை, டி.ஜி.பி., ஸ்ரீலேகா, திருவனந்தபுரத்தில்,
நிருபர்களிடம் நேற்று கூறியதாவது:

அனைத்து தரப்பு மக்களும், ஆதாருடன் இணைக்கப்படுகின்றனர்.
இதன்படி, சிறை கைதிகளையும், ஆதார் திட்டத்தில் பதிவு செய்ய,
கேரள அரசு நடவடிக்கை எடுத்துள்ளது.

சிறைச்சாலை வளாகத்தில், கைதிகளின் தகவல்கள் மற்றும்
அடையாளங்களை பதிவு செய்யும் வகையில், வசதிகள் செய்து
தரப்படுகின்றன.

ஆதார் பதியப்படாத கைதிகளின் தகவல்களை, சம்பந்தப்பட்ட
சிறைச்சாலைகளின் உயரதிகாரிகள் திரட்டி தருவர். ஆதார்
பதிவு செய்வதற்கு தேவையான சான்றிதழ்கள், ஆவணங்களை,
கைதிகளின் வீடுகள், அவர்கள் படித்த பள்ளிகளில் இருந்து
பெறுவதற்கான ஏற்பாடுகளும் செய்யப்பட்டு உள்ளன.

இந்த ஆவணங்களை சரிபார்த்து, அதிகாரிகள் சான்று அளிப்பர்.
அதன்படி, கைதிகளுக்குஆதார் பதிவு செய்யப்பட்டு வழங்கப்படும்.
இவ்வாறு அவர் கூறினார்.

கேரளா முழுவதும் உள்ள சிறைச்சாலைகளில், 8,000 கைதிகள்
உள்ளதாக தகவல்கள் கூறுகின்றன.
-
---------------------------------
தினமலர்